පසුගිය දිනවල ඇදහැලුණු මහ වර්ෂාව හේතුවෙන් අනුරාධපූර දිස්ත්‍රික්කය ආශ්‍රිතව කුඹුරු අක්කර 6000කට අධික ප්‍රමාණයක් විනාශයට පත්ව තිබෙන බව සමස්ථ ලංකා ගොවිජන සේවා සංගමය පවසනවා.
කෙසේ වෙතත් මේ විනාශය සම්බන්ධයෙන් කෘෂිකර්ම අමාත්‍ය මහින්ද අමරවීර කිසිඳු සැලකිල්ලක් නොදක්වන බවටයි ඔවුන් චෝදනා කරන්නේ.
සමස්ථ ලංකා ගොවිජන සේවා සංගමයේ සාමජිකයින් අධික වර්ෂාව නිසා විනාශ වූ බසවක්කුලම සහ තිසා වැව ආශ්‍රිතව අක්කර 50කට වැඩි කුඹුරු නිරීක්ෂනය කළා.
එහිදී මෙම වගාවන් සියල්ලම සම්පූර්ණයෙන් විනාශ වී ඇති බව නිරීක්ෂනය වූ බවයි තිසා වැව මහා වාරි ව්‍යාපාරයේ ඒකාබද්ධ ගොවිජන සංවිධානයේ සභාපති පවසා සිටියේ.
මීට හේතු වී ඇත්තේ තිසා වැව, බසවක්කුම වැව, බුලන් කොලේ යන වැව් තුනෙහි පැමිණ ජලය පිටවීමට ඇති ඇළ පද්ධතීන් ප්‍රමාණවත් නොවීම බවයි ඔවුන් පවසන්නේ.
මේ හේතුවෙන් වැව් තුනෙහි ජලය අධික ලෙස වාන් දාමා සියලුම කුඹුරු යායන් යටවී විනාශ වී තිබෙනවා.
මාස 2කට පමණ පෙර කුඹුරු අස් වද්දා වැපුරුවද අද වනවිට මෙම ප්‍රදේශ දැකගත හකි වන්නේ මුඩු බිම් ලෙසයි.
කඩිනමින් ඇළ පද්ධතීන් පිළිසකර කර සිදු වූ වගා හානීන්ට වන්දි මුදලක් ගෙවන ලෙසටයි ප්‍රදේශයේ ගොවිජනතාව ඉල්ලා සිටින්නේ.
