මහ මැතිවරණයේ තැපැල් ඡන්ද ප්‍රකාශ කිරීමේ දෙවැනි දිනය අදට යෙදී තිබෙනවා.
අද (01) පෙරවරු 8.30 සිට පස්වරු 4.30 දක්වා කාලය තුළ රාජ්‍ය ආයතනවල දී ඒ සඳහා පහසුකම් සලසා ඇති බව මැතිවරණ කොමිෂන් සභාව සඳහන් කළා.
මෙවර මහ මැතිවරණයේ තැපැල් ඡන්දය සලකුණු කිරීමේ පළමු දිනය ලෙස පසුගිය 30 වනදා වෙන් කිරීමටයි කටයුතු කර තිබුණේ.
එහිදී දිස්ත්‍රික් ලේකම් කාර්යාල , මැතිවරණ කොමිෂන් සභා කාර්යාල , ජ්‍යෙෂ්ඨ නියෝජ්‍ය, නියෝජ්‍ය පොලිස්පති කාර්යාලය, පොලිස් අධිකාරි ,සහකාර පොලිස් අධිකාරි කාර්යාල, පොලිස් ස්ථාන සහ විශේෂ කාර්ය බලකාය, විශේෂ පොලිස් ඒකක සහ ප්‍රභූ ආරක්ෂක කොට්ඨාශවල කාර්ය මණ්ඩල සහ එම කාර්යාලවලට අනුයුක්ත සිවිල් කාර්ය මණ්ඩලවලට තැපැල් ඡන්ද සලකුණු කිරීමට අවස්ථාව ලබා දී තිබුණා.
මෙවර මහ මැතිවරණයේ දී රාජ්‍ය සේවකයින් 7,38,050ක සංඛ්‍යාවක් තැපැල් ඡන්දය සඳහා සුදුසුකම් ලබා තිබෙනවා.
මේ අතර 30 වනදා සහ අද (01) දිනයේ තැපැල් ඡන්දය සලකුණු ඉකිරීමට නොහැකිවන රාජ්‍ය සේවකයින්ට ලබන 07 සහ 08 යන දෙදින ද ඒ සඳහන් වෙන්කර ඇති බවයි මැතිවරණ කොමිසම මීට පෙර දැනුම් දී තිබුණා.
