දිවයිනේ ඇතැම් ප්‍රදේශවලට මේ දිනවල ඇදහැලෙන ධාරාණිපාත වර්ෂාව හේතුවෙන් එම ප්‍රදේශවල ඇති වැව්,ගංගා සියල්ලම පාහේ පිටාර මට්ටමට ආසන්න වී තිබෙනවා.
දසත වාර්තාකරු පැවසුවේ කිලිනොච්චියේ ඉරණමඩු ජලාශයේ ද සියලු ම වාන් දොරටු විවර කර ඇති බවයි.
මේ වන විට ජලාශයේ ජල මට්ටම අඩි 36යි අඟල් 10.5ට වඩා ඉහළ මට්ටමක පවතින බැවින් සියලු දොරටු විවෘත කර අතිරික්ත ජලය මුදා හැරීමට ද කටයුතු යොදා තිබෙනවා.
එබැවින් ජලාශයේ පහළ කොටසේ වෙසෙන ජනතාව දැඩි අවධානයෙන් පසුවිය යුතු බවයි කිලිනොච්චිය දිස්ත්‍රික් ආපදා කළමනාකරණ ඒකකය දැනුම්දෙන්නේ.
කිලිනොච්චිය දිස්ත්‍රික්කයට අඛණ්ඩ ව ඇදහැලෙන අධික වර්ෂාව හේතුවෙන් එම දිස්ත්‍රික්කයේ කුඩා පොකුණු වන කනකාම්බිකෙයිකුලම්, වන්නෙරි පොකුණ, බිරමන්තනාරු හි ජලය ද මේ වන විට ඉරණමඩු ජලාශයට ගලා ඒම ආරම්භ වී තිබෙනවා.
මේ අතර ජල පෝෂක ප්‍රදේශවලට ඇද හැලෙන අධික වර්ෂාපතනය හේතුවෙන් මහ කනදරාව වැව වාන්දැමීම ආරම්භ වීමත් සමග වාන් දොරටු දෙක අඩියක් බැගින් විවර කර තිබෙන බවත් වාර්තා වනවා.
