පුද්ගලයින් 07 දෙනෙකුට මරු කැඳවමින් තවත් 25 දෙනෙකුට ආසන්න පිරිසක් ආබාධිතයින් බවට පත් වූ බස්රථ අනතුරක රියදුරෙකුට වසර 13කුත් මාස 03ක කාලයක් බරපතළ වැඩ සහිත ව සිර දඬුවමක් නියම කර තිබෙනවා.
මෙම නඩු තීන්දුව ඊයේ (13) පුත්තලම මහාධිකරණ විනිසුරු නදී අපර්ණා සුහන්දුරුගොඩ මහත්මිය විසින් නියම කරනු ලැබුවා.
තීන්දුවට අමතර ව රුපියල් 55,800ක දඩ මුදලක් ද විනිසුරුවරිය විත්තිකාර පාර්ශ්වය වෙත ගෙවන ලෙසට නියෝග කළා.
මෙලෙස මහාධිකරණයෙන් දඬුවම් නියම වූයේ පෞද්ගලික බස් රථයක රියදුරෙකු ලෙස කටයුතු කළ මොහොමඩ් ජිප්රි මොහොමඩ් වාහිල් නම් වූ 38 හැවිදිරි අයෙකුට යි.
හෙතෙම සිව්දරු පියෙක්.
2017 නොවැම්බර් මස 26 වැනිදා හෝ ඊට ආසන්න දිනයක දී හලාවත – පුත්තලම මාර්ගයේ මදුරන්කුලිය 10 කණුව ප්රදේශයේ දී මෙම අනතුර සිදු වී තිබුණා.
කොළඹ සිට මන්නාරම දක්වා ධාවනය වෙමින් තිබූ බස් රථය මාර්ගයෙන් ඉවතට පැන බෝක්කුවකින් පහළට පෙරළී ගොස් මෙම අනතුර සිදු වූ අතර ඉන් සත් දෙනෙකුට දිවි අහිමි වුණු බවයි අප ප්රාදේශීය වාර්තාකරු පැවසුවා.
සැකකරුට එරෙහි ව මුන්දලම පොලීසියේ රථවාහන අංශය විසින් පුත්තලම දිසා අධිකරණයේ නඩු පවරා තිබූ අතර පසුව නීතිපතිවරයා විසින් චෝදනා ගොනු කරනු ලැබ නඩු විභාගය පුත්තලම මහාධිකරණය වෙත යොමු කළා.
දීර්ඝ නඩු විභාගයකින් අනතුරුවයි සැකකරුට එරෙහි ව මෙම නඩු තීන්දුව ප්රකාශයට පත් කෙරුණේ.
චූදිතට එරෙහි ව නීතිපතිවරයා විසින් චෝදනා 50ක් ගොනු කළ අතර සියලු ම චෝදනාවන්ට චුදිත ව වරදකරු කළ මහාධිකරණ විනිසුරුවරිය එක් එක් චෝදනා සඳහා වෙන වෙනම දඬුවම් ද නියම කළා.
