Azmatullah Omarzai සිය එක්දින ක්‍රිකට් ලෝක කුසලානයක වාර්තා කළ කුළුදුල් අර්ධ ශතකය මීට ටික වේලාවකට පෙර රැස් කරගත්තා.
ඒ ප්‍රබල ඉන්දීය කණ්ඩායමට එරෙහිව යි.
එක්දින ක්‍රිකට් ලෝක කුසලානයේ ආරම්භක වටයේ 09 වැනි තරගයයි දිල්ලි හි දී අද පැවැත්වෙන්නේ.
කාසියේ වාසිය දිනූ ඇෆ්ගන් නායක හෂ්මතුල්ලා ෂහිඩි පළමු ව පිතිකරණය තෝරා ගත්තා.
ඒ අනුව පිටියට පිවිසි ආරම්භක පිතිකරුවන් වන ගුර්බාස් සහ ඊබ්‍රහීම් සද්‍රාන් හට හිතූ තරම් සාර්ථක වන්නට ඉඩක් ලැබුණේ නැහැ.
ඔවුන් දෙදෙනා ම පිළිවෙළින් ලකුණු 21කටත් 22කටත් දැවී ගියා.
ඉන් අනතුරුව ප්‍රවේසම්කාරී ඉනිමක් සිය කණ්ඩායමේ නායකයා සමග ගොඩනගමින් Azmatullah මෙම හැඩකාර ලකුණු 50 රැස් කිරීමට සමත් වුණා.
ඊට වැය වූ පන්දු ගණන 62ක්.
මෙම ලකුණු 50ට හතරේ පහරක් සහ හයේ පහර 03ක් ඇතුළත්.
මෙය අස්මතුල්ලාගේ එක්දින දිවියේ දෙවැනි අර්ධ ශතකය ද වනවා.
සිව්වැනි කඩුල්ල වෙනුවෙන් පිටියෙහි රැඳී සිටින්නේ නායක හෂ්මතුල්ලා යි.
ඔහු ද නොදැවී ලකුණු 50 ක් මේ වනවිට අතැති ව සිටින්නේ ජාත්‍යන්තර එක්දින පිටියේ සිය 17 වැනි අර්ධ ශතකයට ද හිමිකම් කියමින්.
ඔහුගේ ලකුණු 50 දැවැන්ත හතරේ පහර 05කින් වර්ණවත් වුණා.
මේ වනවිට ඇෆ්ගන් ලකුණු පුවරුව පන්දුවාර 32ක් අවසානයේ දී කඩුලු 03ක් දැවී ලකුණු 167 යි.
