දිවයින පුරා ක්‍රියාත්මක කිරීමට නියමිත වන සත්ව සංගණනය අද (15) දිනයේ සිදු කිරීමට නියමිතව තිබෙනවා.
ඒ, අනුව අද (15) පෙරවරු 8.00 සිට පෙරවරු 8.05 දක්වා විනාඩි 05ක කාලයක් සංගණනය පැවැත්වීමට නියමිතයි.
බෝග වගාවන්ට හානි කරන වඳුරා, රිලවා, මොණරා සහ දඬුලේනා යන සත්ව කාණ්ඩ හතර මෙම සංගණනයේ දී සැළකිල්ලට ගනු ලබනවා.
මෙම සංගණනයට අදාළ තොරතුරු සටහන් කිරීම සඳහා තොරතුරු සටහන් කිරීමේ විශේෂ පත්‍රිකාවක් දිවයින පුරා බෙදාහැරීමේ කටයුතු කර ඇති බවයි කෘෂිකර්ම අමාත්‍යංශය පැවසුවේ.
අදාළ පත්‍රිකාව ලැබී නොමැති නම් ඒ පිළිබඳව කලබල නොවී අදාළ කාලය තුළ පැමිණෙන සතුන් පිළිබඳව යම් සටහනක් තබා ගන්නා ලෙසයි කෘෂිකර්ම අමාත්‍යාංශය දැනුම් දෙන්නේ.
මේ අතර බෝග වගාවන්ට හානි කරන වන සත්ත්ව සංගණනය වෙනුවෙන් කෘෂිකර්ම අමාත්‍යාංශ පරිශ්‍රයේ මෙහෙයුම් මැදිරියක් ද ස්ථාපිත කර තිබෙනවා.
මෙම සංගණනයේ දී යම් ගැටළුවක් පැන නැගුණහොත් ස්ථාපිත කර ඇති මෙම මෙහෙයුම් මැදිරියේ දුරකථන අංක 011 2034336 අංකය අමතා විමසීම් කළ හැකියි.
ප්‍රජා සහභාගීත්වයෙන් සිදුකරනු ලබන මෙම සංගණනයට අදාළ කාලය තුළ සහයෝගය පළ කරන ලෙස කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශය සමස්ත ජනතාවගෙන් ඉල්ලා සිටිනවා.
