රටේ කඩාවැටුණු ආර්ථිකය යළි ගොඩනැගිය හැකි නම්; ක්‍රිකට් ක්‍රීඩාව ද යළි නගා සිටුවිය හැකි බව ජනාධිපති රනිල් වික්‍රමසිංහ අවධාරණය කරනවා.
ජනාධිපතිවරයා මේ බව කියා සිටියේ; මාධ්‍ය ආයතන ප්‍රධානීන් සමග අද (14) පස්වරුවේ ජනාධිපති කාර්යාලයේ පැවති හමුවක දී මාධ්‍යවේදියෙකු නැගු ප්‍රශ්නයකට පිළිතුරු ලබාදෙමින්.
මෙවර අයවැය රටේ ආර්ථිකය සහ දේශපාලනය වෙනස් කරන අයවැයක් බව ද ජනාධිපතිවරයා ප්‍රකාශ කළා.
දේශපාලනයකින් තොරව රටේ ආර්ථිකය ගොඩනැගීමේ වැඩපිළිවෙළ සාර්ථක කර ගැනීම සිය අරමුණ බවයි ජනාධිපතිවරයා මාධ්‍ය ආයතන ප්‍රධානීන් අමතමින් සඳහන් කළේ.
රටේ ආර්ථික සහ දේශපාලන ගමන් මග වෙනස් කරන ප්‍රතිසංස්කරණමය වැඩපිළිවෙළට සියලුදෙනාගෙන් සහාය අවශ්‍ය බව සඳහන් කළ ජනාධිපතිවරයා කියා සිටියේ; තමාට අවශ්‍ය මෙරට ක්‍රිකට් ක්‍රීඩාව නැවත ජයග්‍රහණය කරවීමට බවත්, රටේ කඩා වැටුණු ආර්ථිකය යළි ගොඩනැගීමට හැකි නම් ක්‍රිකට් ක්‍රීඩාව ද යළි නගාසිටුවිය හැකි බවට තමන් විශ්වාස කරන බව ද ජනාධිපති රනිල් වික්‍රමසිංහ වැඩිදුරටත් කියා සිටියා.
2024 රාජ්‍ය අය වැය පිළිබඳ මාධ්‍ය ආයතන ප්‍රධානීන් දැනුවත් කිරීම සඳහා මෙම සාකච්ඡාව කැඳවා තිබු අතර මුද්‍රිත සහ විද්‍යුත් මාධ්‍ය නියෝජනය කරමින් පුවත්පත් කතුවරුන් සහ ප්‍රවෘත්ති අධ්‍යක්ෂවරු මීට එක් ව සිටියා.
