ඉන්ධන මිල ඉහළ දැමීමත් සමඟ බස් ගාස්තු ඉහළ නැංවිමට අදාළ යෝජනාව අද (23) කැබිනට් මණ්ඩලයට ඉදිරිපත් කිරීමට නියමිතව තිබෙනවා.
නිවේදනයක් නිකුත් කරමින් ජාතික ගමනාගමන කොමිෂන් සභාව සඳහන් කළේ ලංකා සුදු ඩීසල් මිල ගණන් ද ඉහළ යාම හේතුවෙන් එය බස් ගාස්තු ඉහළ නැංවීමේ සූත්රයට ගැලපූ විට මේ වන විට පවතින බස් ගාස්තුවට 10%කට වඩා වැඩි අගයකින් බලපා ඇති බවයි.
ඒ, අනුව ගාස්තු වැඩිවීම ක්රියාත්මක කිරීම සඳහා අනුමැතිය ලබාගැනීමට අමාත්ය මණ්ඩල සංදේශයක් ඉදිරිපත් කළ බවයි එම කොමිෂන් සභාව සඳහන් කළේ.
කෙසේ වෙතත් බස් ගාස්තු සංශෝධනය ඊයේ (22) දිනයේම සිදුවිය යුතු බව බස් සංගම් පවසා සිටියා.
එම සංගම් වැඩිදුරටත් සඳහන් කළේ ඉන්ධන මිල ඉහළ යෑම තුළ පවතින බස් ගාස්තුව යටතේ බස් රථ ධාවනය කිරීමට නොහැකිව බස්රථ විශාල සංඛ්යාවක් ධාවනයෙන් ඉවත්ව ඇති බවයි.
එමෙන්ම බස් සංගම් සඳහන් කළේ ඉන්ධන මිල ඉහළ යෑම තුළ 15%ත් 20%ත් අතර අගයකින් බස් ගාස්තු ඉහළ දැමිය යුතු බවයි.
මේ අතර ඇතැම් බස්රථ අද (23) දිනයේ සිටම පවතින බස් ගාස්තුවට වඩා වැඩි මිලක් මගීන්ගෙන් අය කිරීමට කටයුතු කරන බවයි තොරතුරු වාර්තා වුණේ.
