ඇමෙරිකාවේ හිටපු ජනපති බරැක් ඔබාමාගේ මිත්තණියක වන කෙන්යාවේ පදිංචි වී සිටි සාරා ඔබාමා අභාවප්‍රාප්ත වී ඇති බව විදෙස් මාධ්‍ය සඳහන් කර තිබෙනවා.
99 හැවිරිදි වියේ පසුවූ ඇය රෝහලකදී මියගොස් ඇති බවයි වාර්තා වන්නේ. බරැක් ඔබාමා ආදරයට ඇයට අමතා තිබෙන්නේ ග්‍රැනී සාරා යන නමිනුයි. 2008 වසරේ ජනාධිපතිවරණ ප්‍රචාරක ව්‍යාපාරය අතරතුර බරැක් ඔබාමා ඇමෙරිකාවේ උපත නොලැබූ මුස්ලිම් ජාතිකයෙකු බවට චෝදනා එල්ල වෙද්දී ඔබාමා වෙනුවෙන් සාරා ඔබාමා පෙනී සිටියා.
පසුව බරැක් ඔබාමා ඇමෙරිකාවේ පළමු කළු ජාතික ජනාධිපතිවරයා ලෙස ඡන්දයෙන් තේරී පත් වීමෙන් පසු සාරාගේ නිවස සංචාරක ආකර්ෂණය දිනාගත් ස්ථානයක් බවටද පත් වුවා. බරැක් ඔබාමාගේ සීයාගේ තුන් වන සහ ලාබාලතම බිරිඳ වූයේ සාරා ඔබාමායි.
ඇය කෙන්යාවේ කිසුමු නගරයේ රෝහලකදී මියගොස් ඇති අතර සාරා ඔබාමා සතියක පමණ කාලයක් රෝගී තත්ත්වයෙන් පසුවූ බවයි. කෙසේ නමුත් ඇයට කොරෝනා වෛරසය ආසාදනය වී නොමැති බවත් සඳහන්.
