කොවිඩ් වසංගත තත්ත්වය හමුවේ නව කොවිඩ් රැල්ලක් නැවත ඇති වුවහොත් එය ජන සමාජයට බලපෑම් එල්ල කළ හැකි බව පොලීසිය සඳහන් කරයි.
අද (01) පැවති මාධ්‍ය හමුවකට එක්වෙමින් පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී නිහාල් තල්දූව මහතා සඳහන් කර සිටියේ, ජනතාව නිසිලෙස සෞඛ්‍ය මාර්ගෝපදේශ අනුගමනය කරමින් කටයුතු කළ යුතු බවය.
මේ පිළිබඳ වැඩිදුරටත් අදහස් දැක්වු පොලිස් මාධ්‍ය ප්‍රකාශකවරයා,
“නොවැම්බර් මස 1 වනදා සිට 15 වන දා දක්වා ක්‍රියාත්මක වන පරිදි සෞඛ්‍ය අධ්‍යක්ෂ ජනරාල්වරයා විසින් නව සෞඛ්‍ය මාර්ගෝපදේශ නිකුත් කරලා තියෙනවා. මෙම මාර්ගෝපදේශ අනුව ඔබගේ දෛනික කටයුතු සිදුකර ගැනීම සඳහා අවශ්‍ය උපදෙස් මාලාවක් නිකුත් කර තිබෙනවා. විශේෂයෙන් සාකච්ඡා පැවැත්වීම්, සම්මන්ත්‍රණ පැවැත්වීම් ආදි කාරණාවලදී හැකිතාක් මාර්ගගත ක්‍රමය භාවිත කරමින් පැවතීමට උපදෙස් ලබාදී තිබෙනවා. ඒ වගේම ඔබ යම්කිසි රැස්වීමක් පවත්වන්නේ නම් එම රැස්වීම පවත්වන ශාලාවේ තුනෙන් එකක ප්‍රමාණය භාවිත වන ආකාරයට රැස්වීම් පැවැත්විය යුතු බවට සඳහන් කරනු ලබනවා. ඒ වගේම විවාහ මංගල උත්සව පැවැත්වීමේ දී උපරිම ආරාධිතයින් සංඛ්‍යාව 100ක් ලෙසට සඳහන් කොට තිබෙනවා. එසේ නොමැති නම් ශාලාවේ ධාරිතාවයෙන් තුනෙන් එකක ප්‍රමාණයකට අමුත්තන් සඳහා ආරාධනා කොට එම ධාරිතාවය අනුව උත්සව පැවැත්වීමේ හැකියාව තිබෙනවා. යම් ආකාරයකින් විවාහ උත්සවයක් එළිමහනේ පවත්වන්නේ නම් ඒ සඳහා උපරිමයෙන් 150 දෙනෙකුට එයට සහභාගී විය හැකි බව සඳහන් වෙනවා. නව සෞඛ්‍ය මාර්ගෝපදේශ අනුව විවිධ දෛිනක කාර්යයන් සඳහා නිර්ණායකයන් පෙන්වා දී තිබෙනවා. ඒ අනුව කටයුතු කිරීම වැදගත් වෙනවා. තවදුරටත් සිනමා ශාලා හා නාට්‍ය ශාලා වැනි ස්ථානවල 25%ක ධාරිතාවයකින් යුතුව නරඹන්නන් කැඳවිය හැකි බවට සඳහන් කර තිබෙනවා. අපි ඉල්ලා සිටිනවා මේ සඳහන් කරලා තියෙන දින 15ක කාල සීමාව තුළ ඔබගේ ආයතනය වේවා, පෞද්ගලික කටයුත්තක් වේවා නිසි පරිදි නිරෝධායන නීතිවලට අනුගත වෙමින්, ඒ වගේම සෞඛ්‍ය මාර්ගෝපදේශ අනුගමනය කරමින් කටයුතු කරන ලෙස. එසේ නොවුණහොත් තවදුරටත් මෙම වසංගත තත්ත්වය නව රැල්ලක් ලෙස පැතිර යෑම ආරම්භ වුවහොත් නැවතත් එය ජන සමාජයට බලපෑම් ඇති කළ හැකියි. එයින් මිදී රටත් සමාජයත් ඉදිරියට රැගෙන යෑම සඳහා අවශ්‍ය දායකත්වය ලබාදෙන ලෙස ඉල්ලා සිටිනවා.”
