කරවල සමඟ රැගෙන ගිය කෝටි 08ක මත් කරල් කොස්වත්තේ දී අල්ලයි

ඉන්දියාවේ සිට මුහුදු මාර්ගයෙන් මෙරටට ගෙන්වන ලද මත්කරල් 8,63,680ක් අත්අඩංගුවට ගැනීමට කොස්වත්ත පොලීසියට හැකිව තිබෙනවා.

මුහුදු මාර්ගයෙන් මෙරටට ගෙනැවිත් තිබූ මෙම මත්කරල් තොගය කරවල ප්‍රවාහනය කරන මුවාවෙන් ලොරි රථයක් මඟින් කල්පිටිය සිට කොළඹ දක්වා රැගෙන යාමට ජාවාරම්කරුවන් කටයුතු කර ඇති අතර ඒ සම්බන්ධයෙන් රාජ්‍ය බුද්ධි සේවයට ලැබුණු තොරතුරකට අනුව අදාළ ලොරි රථය අත්අඩංගුවට ගන්නා ලෙස කල්පිටිය සිට කොළඹ දක්වා වූ සියලුම පොලිස් ස්ථාන වෙත උපදෙස් ලැබී ඇති බවයි වාර්තා වන්නේ.

ඒ අනුව ඊයේ (25) දිනයේ අළුයම, ලද තොරතුරක් අනුව එම ලොරි රථය නාත්තන්ඩිය, කොට්‌ටරාමුල්ල ප්‍රදේශයේ ගරාජයක තිබී සොයා ගැනීමට කොස්වත්ත පොලීසියට හැකිව තිබෙනවා.

ලොරි රථය කාර්මික දෝෂයකට ලක්ව, එහි පැමිණි පුද්ගලයන් ලොරි රථය ගරාජයේ තබා ගිය බවයි ගරාජයේ හිමිකරු පොලීසියට පවසා ඇත්තේ.

කෙසේ වෙතත් අද (26) අළුයම වනතුරු එම රථයේ හිමිකරු හෝ රියදුරු නැවත ලොරි රථය ලබා ගැනීම සඳහා නොපැමිණීම නිසා ලොරි රථය තම බාරයට ගැනීමට කොස්වත්ත පොලීසියේ නිලධාරීන් කටයුතු කර තිබෙනවා.

ලොරි රථය තුළ පිටතට පෙනෙන ලෙස කරවල පෙටිටි 12 ක් සහ මත්කරල් අඩංගු පෙට්ටි 06ක් පොලිසිය විසින් සොයාගෙන තිබෙනවා.

එම මත්කරල් තොගයේ වටිනාකම රුපියල් කෝටි 08 ක් පමණ වන බවයි පොලිසිය සඳහන් කළේ.

මේ වන විට අදාළ ලොරි රථයේ හිමිකරු හදුනා ගෙන ඇති බවත් ඔහු අත්අඩංගුවට ගැනීම සඳහා විමර්ශණ ක්‍රියාත්මක බවත් පොලිසිය කියා සිටියා.