පේරාදෙණිය විශ්වවිද්‍යාලයේ නිල ලංඡනය අවභාවිත කරමින් මාර්ගගත පාඨමාලා සඳහා සිසුන් සම්බන්ධ කර ගැනීමේ මහා පරිමාණ ජාවාරමක් මුහුණු පොත ඇතුළු සමාජ මාධ්‍ය ඔස්සේ ක්‍රියාත්මක බවට තොරතුරු වාර්තා වී තිබෙනවා.
මේ සම්බන්ධයෙන් පේරාදෙණිය විශ්වවිද්‍යාලය මඟින් පොලිස් පරිගණක කොට්ඨාසය වෙත පැමිණිල්ලක් ඉදිරිපත්කර ඇති බවයි වාර්තා වුණේ.
එම විශ්වවිද්‍යාලයේ මාධ්‍ය ප්‍රකාශක, නියෝජ්‍ය උපකුලපති මහාචාර්ය ටෙරන්ස් මදුජිත් සඳහන් කළේ මේ සම්බන්ධයෙන් ෆේස්බුක් සමාගම වෙත ද පැමිණිල්ලක් සිදුකළ බවයි.
කළමණාකරන, ආර්ථික, සමාජ විද්‍යා හා මනෝවිද්‍යා පාඨමාලා මාර්ගගත ක්‍රමය ඔස්සේ පවත්වන බව දක්වමින් විශ්වවිද්‍යාලයේ නිල ලංඡනය අවභාවිත කරමින් සමාජ මාධ්‍යවල අදාළ දැන්වීම පළකර තිබෙන අතර, මෙම වංචා සහගත ක්‍රියාවලියට මහජනතාව රැවටීමේ වැඩිඉඩක් පවතින බැවින් මේ සම්බන්ධයෙන් කඩිනමින් විමර්ශනයක් කරන ලෙසයි විශ්වවිද්‍යාලයේ මහජන සම්බන්ධතා නිලධාරි මහේෂ් අබේවික්‍රම පොලිසියෙන් ඉල්ලා සිටින්නේ.
