පළාත් පාලන මැතිවරණය සඳහා බාරදුන් නාමයෝජනා අවලංගු කිරීමට අමාත්යාංශයීය උපදේශක කාරක සභාවේ ඒකමතික එකඟත්වය පළවී තිබෙනවා.
පළාත් පාලන මැතිවරණ නොපැවැත්වීම හේතුවෙන් ඒ සඳහා නාමයෝජනා බාර දුන් අපේක්ෂකයින් මහත් අපහසුතාවයකට පත්ව ඇති බැවින් මෙම අර්බුදකාරී තත්වයට පිළියමක් ලෙස එම නාමයෝජනා අවලංගු කිරීමට අවශ්ය පියවර ගැනීමටයි ඒකමතික එකඟත්වය හිමි වූයේ.
මෙලෙස ඒකමතික එකඟත්වය හිමි වී ඇත්තේ අග්රාමාත්ය දිනේෂ් ගුණවර්ධනගේ ප්රධානත්වයෙන් පාර්ලිමේන්තුවේදී පැවති රාජ්ය පරිපාලන, ස්වදේශ කටයුතු, පළාත් සභා හා පළාත් පාලන කටයුතු පිළිබඳ අමාත්යාංශයීය උපදේශක කාරක සභාවේදීයි.
ක්ෂේත්ර නිලධාරීන්ට තම මැතිවරණ බල ප්රදේශය තුළ ඡන්දය ඉල්ලීමට ඇති බාධා සහ එම බාධා ඉවත් කිරීම සඳහා අදාළ පනත සංශෝධනය කිරීම පිළිබඳව මෙහිදී සාකච්ඡාවට ලක්වී තිබෙනවා. මේ සඳහා නීතිපති උපදෙස් පරිදි, සංශෝධනයට ලක් වූ පනතක්, සංශෝධනයට පෙර පැවති ලෙස නැවතත් වෙනස් කිරීමට අවශ්ය නම්, ඒ සඳහා පාර්ලිමේන්තුවේ 2/3ක බහුතර අනුමතිය සහ ජනමත විචාරණයක් අවශ්ය බවයි පැමිණ සිටි නිලධාරීන් කියාසිටියේ.
තවද, පළාත් සභා අමාත්යාංශවල ලේකම්වරු ස්ථාන මාරු කිරීමේ ක්රමවේදය ක්රමවත් කිරීම සහ සේවා ව්යවස්ථාවේ සඳහන් පරිදි ප්රාදේශීය ලේකම්වරු සඳහා ස්ථාන මාරු කිරීම් සිදු කිරීම සම්බන්ධයෙන් ප්රගති සමාලෝචනය කිරීම ද මෙහිදී සිදු කෙරුණා.
පළාත් රාජ්ය සේවයේ නිලධාරීන්ට නිසි පරිදි ස්ථානගත නොකිරීම පිළිබදවත් මෙහිදී අවධානය යොමු වී තිබෙනවා. ඒ අනුව ප්රාදේශීය ලේකම්වරුන් ඇතුළු සියලු පරිපාලන නිලධාරීන්ගේ ස්ථානගත කිරීම් නිසි පරිදි සිදු කළ යුතු බවයි අග්රාමාත්යවරයා අවධාරණය කළේ. ඒ අනුව වහාම ඒ සදහා පියවර ගන්නා ලෙස අග්රාමාත්යවරයා නිලධාරීන්ට උපදෙස් ලබා දී තිබෙනවා.
රාජ්ය සේවයට අලුතින් බඳවා ගැනීම් සිදු කිරීම පිළිබඳ අලුත් තීරණයක් නොමැති බැවින් හා පළාත් සහ සමස්ත රාජ්ය සේවය තුළ පුරප්පාඩු පවත්නා නිසාත්, එම පුරප්පාඩු සඳහා කළමනාකරණ සේවා නිලධාරී තෙවන ශ්රේණියේ සීමිත තරඟ විභාගයෙන් ඉහළ ලකුණු ප්රමාණයක් ලබා ගෙන මේ වන විටත් පත්වීම් ලබා සිටින සේවකයන් එම පුරප්පාඩු පවත්නා තනතුරුවල පිහිටු වීමට කටයුතු කිරීම පිළිබඳව ද මෙහිදී සාකච්ඡා කෙරුණා.
