දිවයින පුරා පිහිටි ප්‍රධාන රෝහල් දහයක සෞඛ්‍ය සේවකයින් අද (02) දිනයේ පැය හතරක කාලයක් සේවාවලින් ඉවත් වී වෘත්තීය ක්‍රියාමාර්ගය නිරතවීමට තීරණය කර තිබෙනවා.
සෞඛ්‍ය සේවක ගැටළු සම්බන්ධයෙන් ඊයේ (01) පැවැත්වීමට තිබූ සාකච්ඡාවට අවස්ථාව නොලැබීම හේතුවෙන් මෙලෙස අද (02) මෙම වෘත්තීය ක්‍රියාමාර්ගයට එළෙඹෙන බවයි සෞඛ්‍ය වෘත්තීය සමිති සන්ධානය සඳහන් කළේ.
ඒ, අනුව අද (02) උදෑසන 8.00 සිට දහවල් 12.00 දක්වා පැය හතරක කාලයක් මෙම වෘත්තීය සමිති ක්‍රියාමාර්ගයේ නිරතවන බවයි එම වෘත්තීය සමිති සන්ධානය වැඩිදුරටත් පැවසුවේ.
කොළඹ ජාතික රෝහල, ගම්පහ මහ රෝහල, කරාපිටිය ශික්ෂණ රෝහල, යාපනය ශික්ෂණ රෝහල, පේරාදෙණිය ශික්ෂණ රෝහල, කෑගල්ල මහ රෝහල, පොළොන්නරුව මහ රෝහල, මඩකලපුව ශික්ෂණ රෝහල,ත්‍රිකුණාමලය ශික්ෂණ රෝහල සහ මන්නාරම මූලික රෝහල යන රෝහල්වල සේවකයින් අද (02) දිනයේ මෙම වෘත්තීය සමිති ක්‍රියාමාර්ගයේ නිරත වනවා.
මේ අතර සෞඛ්‍ය සේවක ඉල්ලීම් සම්බන්ධයෙන් සාකච්ඡාවක් ජනාධිපති කාර්යාලයේ දී පැවැත්වීමට නියමිත බවට වාර්තා වනවා.
සෞඛ්‍ය අමාත්‍යවරයා ඇතුළු පිරිසක් එම සාකච්ඡාව සඳහා සහභාගි වීමට නියමිත බවයි වැඩිදුරටත් තොරතුරු වාර්තා වුණේ.
අද (02) දිනයේ පැවැත්වෙන සාකච්ඡාවෙන් සිය ඉල්ලීම් සම්බන්ධයෙන් නිසි පිළිතුරක් නොලැබුණහොත් අඛණ්ඩ වෘත්තීය සමිති ක්‍රියාමාර්ගයක නිරත වන බවයි සෞඛ්‍ය වෘත්තීය සමිති සන්ධානය අනතුරු අඟවා සිටියේ.
