නායකත්ව ඉනිමක වටිනාකම මැනවින් පෙන්නුම් කරමින් අසලංකගෙන් අර්ධ ශතකයක්

ජාත්‍යන්තර එක්දින පිටියේ සිය 16 වැනි අර්ධ ශතකය සම්පූර්ණ කිරීමට නායක චරිත් අසලංක අද (02) පස්වරුවේ සමත් වුණා.

ඒ තරග තුනකින් සමන්විත බංග්ලාදේශයට එරෙහිව පැවැත්වෙන එක්දින තරගාවලියේ පළමු තරගයට කොළඹ ආර්. ප්‍රේමදාස ක්‍රීඩාංගණයේ දී එක්වෙමින්.

අසලංක පන්දු 61ක දී මෙම අර්ධ ශතකය වාර්තා කළා.

ඊට හයේ පහර 03ක් සහ හතරේ පහර 03ක් ද ඇතුළත්.

කාසියේ වාසිය දිනූ ශ්‍රී ලංකා කණ්ඩායම පළමු ව පන්දුවට පහරදීම තෝරාගත්ත ද, ඔවුන්ට ආරම්භයේ සිට සාර්ථක වීමට බංග්ලාදේශ පන්දු යවන්නන් ඉඩ දුන්නේ නැහැ.

ආරම්භක කඩුල්ලට ටන්සිම් හසන්ගේ පන්දුවකට බිලි වූ පැතුම් නිස්සංක කිසිදු ලකුණක් නොලබා ම දැවී යද්දී, නිශාන් මධුෂ්ක ද ලකුණු 06කට දැවී ගියා.

කමිඳු මෙන්ඩිස් ද පන්දු 04ක් මුහුණ දී යළි ක්‍රීඩාගාරයේ අසුන් ගත් ප්‍රේක්ෂකයෙකු පමණක් වූයේ ටස්කින් අහමඩ්ගේ පන්දුවක් හමුවේයි.

කුසල් මෙන්ඩිස් ලකුණු 45ක් ලබා ගත්තා.

මේ වනවිට ශ්‍රී ලංකා කණ්ඩායම කඩුලු 04ක් බිඳ වැටී ලකුණු 126ක් ලබා සිටිනවා.

පිටියේ රැඳී සිටින්නේ ජනිත් ලියනගේ සමගින් නායක අසලංකයි.