අනිවාර්යය රාජකාරි නිවාඩු යවා සිටින පොලිස්පති දේශබන්දු තෙන්නකෝන්ට ඇප හිමි ව තිබෙනවා.
අද (10) පෙරවරුවේ විත්තිකාර දේශබන්දු තෙන්නකෝන් ව දුම්බර බන්ධනාගාරයේ සිට දැඩි රැකවල් මධ්යයේ රැගෙනවිත්, මාතර මහේස්ත්රාත් අධිකරණය වෙත ඉදිරිපත් කළා.
එහිදී මහේස්ත්රාත් අරුණ ඉන්ද්රජිත් බුද්ධදාස මහතා නියෝග කළේ විත්තිකරු හට රුපියල් ලක්ෂ 10 බැගින් වන ශරීර ඇප දෙකක් මත මුදා හැරීමට නියෝග කරන බවයි.
එමෙන්ම විදෙස් ගමන් තහනමක් ද පනවමින් මහේස්ත්රාත්වරයා නියෝග කළේ විදේශ ගමන් බලපත්රය අධිකරණය වෙත භාරදිය යුතු බවයි.
කිසිදු ආකාරයකින් අදාළ නඩුවට සම්බන්ධ සාක්ෂිකරුවන්ට බලපෑම් නොකළ යුතු බවට ද චූදිත තෙන්නකෝන් හට විනිසුරුවරයා දැඩිව අවවාද කළා.
කිසියම් හෝ ආකාරයකින් සාක්ෂිකරුවන්ට බලපෑම් කළහොත්, ඇප අවලංගු කරන බවටයි මාතර මහේස්ත්රාත්වරයා නියෝග කළේ.
දෙවන සැකකරුගේ සිට අටවන සැකකරු දක්වා දී ඇති ඇප ප්රදානය සහ එම කොන්දේසි පළමු වන සැකකරු වෙනුවෙන් ද අදාළ වන බව මහේස්ත්රාත්වරයා ඇප පිරිනැමීම ප්රකාශයට පත් කරමින් සඳහන් කළා.
නීතිපතිවරයා වෙනුවෙන් අතිරේක සොලිසිටර් ජනරාල් දීලිප පිරිස් මහතා පෙනී සිටිය අතර සැකකාර දේශබන්දු තෙන්නකෝන් මහතා වෙනුවෙන් ජනාධිපති නීතිඥ අනුජ ප්රේමරත්න මහතා සහ ශානක රණසිංහ මහතා පෙනී සිටියා.
අනිවාර්යය රාජකාරි නිවාඩු යවා සිටින පොලිස්පති දේශබන්දු තෙන්නකෝන්ට ඇප ලබාදෙනවා ද නැද්ද? යන්න සලකා බැලෙන නඩු තීන්දුව අද ප්රකාශයට පත් කිරීමට දින නියම කර තිබුණා.
ඒ අප්රේල් මස 03 වැනි දින විත්තිකාර දේශබන්දු තෙන්නකෝන්ව මාතර මහේස්ත්රාත් අරුණ ඉන්ද්රජිත් බුද්ධදාස මහතා හමුවට ඉදිරිපත් කිරීමෙන් පසුව විනිසුරුවරයාගේ නියෝග පරිදි අද දින තෙක් සැකකරුව රක්ෂිත බන්ධනාගාරගත කිරීමත් සමගයි.
එදින අධිකරණයේ දී නඩු විභාගය ආරම්භ වුණු අතර පැය එකහමාරකට අධික කාලයක් විත්තිකාර තෙන්නකෝන් වෙනුවෙන් නීතිඥවරුන් කරුණු දැක්වීමක් සිදු කළා.
එම කරුණු දැක්වීම මගින් සිය සේවාදායකයා හට ඇප ලබාදෙන ලෙසයි නීතිඥවරුන් ඉල්ලා සිටියේ.
නමුත් රජයේ පාර්ශ්වය වෙනුවෙන් පෙනී සිටින අතිරේක නියෝජ්ය සොලිසිටර් ජනරාල් දිලීප පීරිස් අධිකරණය හමුවේ කරුණු දක්වමින් එදිනත් දේශබන්දු තෙන්නකෝන් හට ඇප ලබා දීමට විරුද්ධ වුණා.
ඒ අනුව මහේස්ත්රාත්වරයා පැවසුවේ විත්තිකරුව අද තෙක් රක්ෂිත බන්ධනාගාරගත කරන ලෙසත්, ඇප ඉල්ලීම පිළිබඳ ව වන තීන්දුව එදින ප්රකාශයට පත් කරන බවයි.
වැඩ තහනමට ලක් ව සිටින පොලිස්පති දේශබන්දු තෙන්නකෝන් මහතා ඉකුත් 20 වනදා අධිකරණය වෙත ඉදිරිපත් කිරීමෙන් පසු අප්රේල් 03 වැනි දා දක්වා රක්ෂිත බන්ධනාගාරගත කෙරුණා.
2023 වසරේ වැලිගම W15 හෝටලය අසල සිදු වු වෙඩිතැබීමේ සිද්ධියකට අදාළ ව අත්අඩංගුවට ගැනීමට වරෙන්තු නිකුත් කර සිටි දේශබන්දු තෙන්නකෝන් මහතා, දින 20ක කාලයක් සැඟව සිට ඉකුත් 19 දිනයේ අධිකරණයට භාරවුණේ මෝසමක් ඉදිරිපත් කරමින්.
මේ අතර, රක්ෂිත බන්ධනාගාරගත කර සිටින පොලිස්පති දේශබන්දු තෙන්නකෝන් මහතා ධුරයෙන් ඉවත් කිරීමට අදාළ යෝජනාව ද පෙරේදා (08) පාර්ලිමේන්තුවට ඉදිරිපත් කෙරුණා.
එහිදී අදාළ නිලධාරියාව ධුරයෙන් ඉවත් කිරීමට අදාළ ව විශේෂ පරීක්ෂණ කමිටුවක් පත් කිරීම සම්බන්ධයෙන් පාර්ලිමේන්තුවේ දී ඡන්දයක් පැවැත්වූ අතර එම ඡන්දයේ දී අදාළ යෝජනාව මනාප 151කින් ඒකමතික ව සම්මත වුණා.
ඒ කිසිදු විපක්ෂයේ විරුද්ධ ඡන්දයක් හෝ නොමැතිවයි.
