සෑම අවස්ථාවකම රට ජයග්‍රහණය කරා මෙහෙයවීමට වැඩකරන ජනතාව ලබාදුන්නේ සුවිශේෂී දායකත්වයක් බව ජනාධිපති රනිල් වික්‍රමසිංහ පවසනවා.
අදට (01) යෙදෙනෙ ජාත්‍යන්තර කම්කරු දිනය වෙනුවෙන් විශේෂ පණිවුඩයක් නිකුත් කරමින් ජනාධිපතිවරයා මේ බව සඳහන් කරනවා.
පසුගිය වසරේ මැයි දිනය සමරන අවස්ථාවේ දී රට ඉතා දරුණු ආර්ථීක කඩා වැටීමකට තිබූ බවත්, ඒ හේතුවෙන් සියලු දෙනාට දැඩි දුෂ්කරතත්වයකට මුහුණදීමට සිදුව තිබූ බවත් ජනාධිපතිවරයා මෙම පණිවුඩය මඟින් සිහිපත්කර තිබෙනවා.
මේ උදාවී ඇත්තේ ශ්‍රී ලාංකික වැඩකරන ජනතාවගේ ලොවට ප්‍රදර්ශනය කර හැකි අවස්ථාවක් බවයි ජනාධිපතිවරයා පෙන්වා දෙන්නේ.
මේ අතර වැඩකරන ජනතාව වෙනුවෙන් ස්ථාපිතකර ඇති සේවක අර්ථසාධක අරමුදලට කිසිඳු හානියක් සිදුවීමට ඉඩ නොතබන බව ද ඔහු මෙහිදී අවධාරණය කරනවා.
එමෙන්ම 2048 වසර වනවිට දියුණු ශ්‍රී ලංකාවක් ගොඩනැඟීමට එකමුතුව අත්වැල් බැඳගන්නා ලෙසට ද ජනාධිපති රනිල් වික්‍රමසිංහ මෙවර මැයි දින පණිවුඩය මඟින් ආරාධනයක් ද කර සිටිනවා.
