දිගින් දිගටම ශ්‍රී ලන්කන් ගුවන් යානා ප්‍රමාද වීමට ප්‍රධානතම හේතුව ශ්‍රී ලන්කන් ගුවන් සේවය සතු ගුවන් යානා සංඛ්‍යාව ප්‍රමාණවත් නොවීම බව එම ගුවන් සේවයේ ප්‍රකාශකවරයෙකු පවසනවා.
සිය දෛනික ගුවන් ගමන් මෙහෙයුම් සදහා ගුවන් යානා 24ක් අවශ්‍ය වුවද, දැනට ක්‍රියාකාරී මට්ටමේ ධාවන කටයුතුවල නිරතව ඇත්තේ ගුවන් යානා 20ක් පමණක් බවයි එම ප්‍රකාශකවරයා වැඩිදුරටත් පැවසුවේ.
එහෙත් තවත් ඒ – 330 සහ ඒ – 320 ගුවන් යානා දෙකක් දිගුකාලීන අත්‍යාවශ්‍ය නඩත්තු කටයුතු සදහා යොමු කර පවතින බවත්, තවත් ඒ – 320 නියෝ කාණ්ඩයේ ගුවන් යානා දෙකක්, ප්‍රංශයේ එයා බස් සමාගමේ සිට නව එන්ජින් ලැබෙන තෙක් ධාවනයෙන් ඉවත්කර ගාල්කර පවතින බව ද ඔහු සඳහන් කළා.
මීට අමතරව ශ්‍රී ලන්කන් ඉංජිනේරු අංශයේ සේවයේ නිරත 30 දෙනෙකු පමණ ඉන් ඉවත් වී, විදේශීය ගුවන් සේවා වෙත ගොස් ඇති බැවින් දැනට ඉතිරි සේවකයින්ගෙන් අවශ්‍ය වැඩ කටයුතු ආවරණය කරගන්නා බව ද එම ප්‍රකාශකවරයා වැඩිදුරටත් සන්ධාන කර සිටියා.
මෙවැනි තත්ත්වයක් මත අද (28) උදෑසනත් පකිස්තානයේ ලාහෝර්, ඉන්දියාවේ චෙන්නායි සහ බංග්ලාදේශයේ ඩකා බලා කටුනායක ගුවන් තොටුපොළෙන් පිටත්ව යාමට නියමිත ගුවන් යානා ප්‍රමාදවීම්වලට ලක්ව තිබුණා.
මෙසේ මෙම ගුවන් යානා ප්‍රමාද වීම හේතුවෙන් සිය ගුවන් මගීන් පත්වන අපහසුතාව පිළිබඳව සිය කණගාටුව ප්‍රකාශ කරන බවත්, මෙම ගුවන් මගීන් ඉතා ඉක්මනින් සිය ගමනාන්ත වෙත පිටත් කර හැරීමට අවශ්‍ය පියවර ගන්නා බව ද එම ප්‍රකාශකවරයා පැවසුවා.
wpDiscuz
