දළ දේශීය නිෂ්පාදිතයට උතුරෙන් ලැබෙන දායකත්වය වැඩි කළ යුතුයි – සජිත් කියයි

මෙරට දළ දේශීය නිෂ්පාදිතයට උතුරුකරයෙන් ලැබෙන දායකත්වය ඉහළ දැමිය යුතු බව විපක්ෂ නායක සජිත් ප්‍රේමදාස පවසනවා.

විපක්ෂ නායකවරයා මේ බව කියා සිටියේ ඊයේ (12) යාපනය කෝපායි නීර්වේලි අත්තියර් හින්දු විද්‍යාලයට සක්වල සුහුරු පන්ති කාමර වැඩසටහනේ 233 වැනි අදියර යටතේ රුපියල් 1,177,000 වටිනා සුහුරු පන්ති කාමරයක් පරිත්‍යාග කිරීමේ අවස්ථාවට එක්වෙමින්.

බස්නාහිර පළාත දළ දේශීය නිෂ්පාදිතයට 43.4%ක දායකත්වයක් ලබා දෙන විට වයඹ පළාත 11.2%ක් සහ මධ්‍යම පළාත 10%ක දායකත්වයක් ලබා දෙන බව ද සජිත් ප්‍රේමදාස මහතා අවධාරණය කළා.

මන්නාරම, වව්නියා, මුලතිව්, කිලිනොච්චි සහ යාපනය යනාදී පරිපාලන දිස්ත්‍රික්ක 5ක් ඇති උතුරු පළාත දළ දේශීය නිෂ්පාදිතයට දායකත්වය ලබා දෙන්නේ 4.1%ක් වැනි අවම ප්‍රමාණයක් බව පෙන්වූ විපක්ෂ නායකවරයා මෙසේ උතුරු පළාතෙන් ලැබෙන දායකත්වය අඩු වීමට හේතුව උතුරේ ආර්ථික ක්‍රියාකාරීත්වය දුබල මට්ටමක පැවැතීම බවයි සඳහන් කළේ.

එබැවින් උතුරු පළාත රටට දෙන ආර්ථික සවිය වර්ධනය කළ යුතු බවට ද විපක්ෂ නායකවරයා පැවසුවා.