ගාල්ල දඩල්ල ප්‍රදේශයේ සංචාරක හෝටලයක් අසලදී මාර්ගය අසල රැඳී සිටි දෙදෙනෙකුට වෙඩි තැබීමේ සිද්ධියට සම්බන්ධ සැකකරුවන් 4 දෙනෙකු අත්අඩංගුවට ගෙන තිබෙනවා.
ඒ ගාල්ල පොලිසිය සහ ගාල්ල කොට්ඨාස අපරාධ විමර්ශන කාර්යාංශය සිදු කළ මෙහෙයුමකට අනුවයි.
පිටිදූව, හීනටිගල සහ බෝගහගොඩ ප්‍රදේශවලදී අත්අඩංගුවට ගත් සැකකරුවන් වැඩිදුර විමර්ශන සඳහා ගාල්ල පොලිසියට භාරදී තිබෙනවා.
අවුරුදු 24 සහ 33 අතර වයස්වල පසුවන සැකකරුවන් හබරාදුව සහ උණවටුන ප්‍රදේශවල පදිංචිකරුවන්.
ඊයේ (18) දහවල් 1.40ට පමණ දඩල්ල ප්‍රදේශයේ සංචාරක හෝටලයක් ඉදිරිපිටට ත්‍රී රෝද රථයකින් පැමිණ සිටි දෙදෙනෙකු ඉලක්ක කර සුදු පැහැති මෝටර් රථයකින් පැමිණි පිරිසක් වෙඩි තැබීම සිදු කර පළා ගොස් තිබුණා.
කෙසේවෙතත් එම වෙඩි තැබීමෙන් කිසිවෙකුටත් හානියක් සිදුව තිබුණේ නැහැ. සිදු කරන ලද විමර්ශනවලට අනුවයි ගාල්ල කොට්ඨාස අපරාධ විමර්ශන කාර්යාංශයේ නිලධාරීන් විසින් මෙම අපරාධයට ආධාර අනුබල දීම සහ කුමන්ත්‍රණය කිරීම සම්බන්ධයෙන් ඊයේ රාත්‍රී සැකකරුවන් 4 දෙනෙකු අත්අඩංගුවට ගෙන ඇත්තේ.
මෙම වෙඩි ප්‍රහාරය එල්ල කර පළාගිය සැකකරුවන් පැමිණි මෝටර් රථය ද පොලිසිය විසින් ඊයේ පස්වරුවේ සොයාගෙන තිබුණා.
ගාල්ල කොට්ඨාශ අපරාධ විමර්ශන අංශය මෙම සිද්ධිය සම්බන්ධයෙන් සිදු කළ විමර්ශණවලදී හෙළිවූ තොරතුරු අනුවයි අදාළ මෝටර් රථය හබරාදූව බෝගහගොඩ ප්‍රදේශයේදී සොයාගෙන ඇත්තේ.
අත්අඩංගුවට ගත් සැකකරුවන් අතර මෙම වෙඩි තැබීම සඳහා මෝටර් රථය කුලියට ලබාදුන් සහ කුලියට ලබාගත් පුද්ගලයින් දෙදෙනා මෙන්ම එය වෙඩික්කරුවන් වෙත රැගෙන ගොස් ලබාදුන් පුද්ගලයින් දෙදෙනෙක් අයත්.
මෝටර් රථයෙන් පැමිණි පුද්ගලයින් දෙදෙනෙකු දඩල්ල සංචාරක හෝටලයක් අසල සිටි පිය පුතු දෙපළට මිලිමීටර් 9 වර්ගයේ ගිනි අවියකින් වෙඩි තබා ඇති බවටයි පොලිස් පරික්ෂණවලදි හෙළිවී ඇත්තේ.
වෙඩි ප්‍රහාරයේ ඉලක්කය වූ දෙදෙනා උණවටුණ මැටරඹ පුදේශයේ පදිංචිකරුවන්. ඊයේ (18) පස්වරුවේ දී පුතුගේ යතුරුපැදියට අවශ්‍ය අමතරකොටස් කිහිපයක් මිලදී ගැනිම සදහා පියා පුතු සමග ත්‍රී රෝද රථයෙන් ගාල්ල නගරයට පැමිණ තිබුණා.
එම අවස්ථාවේ දි දඩැල්ල ප්‍රදේශයේ හෝටලයක රැඳී සිටින විදේශිකයින් දෙදෙනෙකු රැගෙන යාමට එන ලෙසටයි පියාට දුරකථන ඇමතුමක් ලැබී ඇත්තේ.
ඔහු පුතු සමග ත්‍රී රෝද රථයෙන් පැමිණ එම හෝටලය ඉදිරිපිට රථය නතර කර මාර්ගයට පැමිණ තිබුණා.
එම අවස්ථාවේදීයි මෝටර් රථයෙන් පැමිණි පුද්ගලයින් මෙම පිය පුතු දෙපළට වෙඩි තබා ඇත්තේ. මොවුන්ට වෙඩි වැදී නොමැති අතර ත්‍රී රෝද රථයෙන්ම ගාල්ල පොලිසියට පැමිණි මේ පිළිබඳ පැමිණිලි කර තිබෙනවා. මෙම පුද්ගලයාගේ පුත්‍රයා 14 හැවිරිදි වියේ පසුවන අයෙක්.
දැනට විදේශගතව සිටින පාතාලයට සම්බන්ධ සහෝදරයන් දෙදෙනෙකු අතර පවතින ගැටුමක ප්‍රථිපලයක් වශයෙන් මෙම වෙඩි තැබිම සිදුව ඇති බවටයි පොලිසිය සැක කරන්නේ.
පාතාලයට සම්බන්ධ එම සහෝදරයන් දෙදෙනාගෙන් වැඩිමහල් සහෝදරයාගේ සමීපතමයෙකුට බාල සොහොයුරාගේ සමීපතමයින් විසින් මෙම වෙඩි තැබීම සිදු කර ඇතැයි විමර්ශනවලදී අනාවරණ වී තිබෙනවා.
මෝටර් රථයෙන් පැමිණි වෙඩික්කරු සහ වෑන් රථය පදවාගෙන පැමිණි පුද්ගලයා අත්අඩංගුවට ගෙන නැහැ.
