යුද නීතිය ප්‍රකාශයට පත් කිරීම සම්බන්ධයෙන් දකුණු කොරියානු ජනාධිපති යූන් සුක් යෙයෝල් සමාව අයැද තිබෙනවා.
ජනාධිපතිවරයා සමාව අයැදිමින් පැවසුවේ ඉදිරියේ දී තවත් එවැනි නියෝගයන් සිදු නොකරන බවයි.
පසුගිය අඟහරුවාදා රාත්‍රියේ දකුණු කොරියානු ජනාධිපතිවරයා යුද නීතිය ප්‍රකාශයට පත් කිරීමට කටයුතු කළ අතර, කෙසේ වෙතත් එය වහාම ඉවත් කිරීමටයි පසුව කටයුතු කළේ.
ජනාධිපතිවරයාගේ මෙම තීරණය හේතුවෙන් ඔහුට දෝෂාභියෝගයකට මුහුණ දීමට ද සිදුව තිබෙනවා.
“මට ඉතා කණගාටුයි, කම්පනයට පත් වූ ජනතාවගෙන් අවංකවම සමාව අයදින්න කැමතියි,” යනුවෙන් දකුණු කොරියානු ජනාධිපතිවරයා එරට රූපවාහිනී ඔස්සේ මහජනතාව අමතමින් සමාව අයැද සිටියා.
මේ අතර දකුණු කොරියානු විපක්ෂ නායක ලී ජේ-මියුන් ඊයේ (06) කියා සිටියේ ජනාධිපති යූන්ගේ ප්‍රකාශය ගැන තමා කලකිරීමට පත් වූ බවත්, එමඟින් සිදු වූයේ මහජනතාවගේ කෝපය වැඩි කිරීම පමණක් බවයි.
ජනාධිපතිවරයා ධුරයෙන් ඉවත් කිරීමට හැකි උපරිමයෙන් කටයුතු කරන බවද ලී වැඩිදුරටත් පවසා සිටියා.
