දකුණු අප්‍රිකාවට එරෙහිව පැවති ටෙස්ට් තරගාවලියේ පළමු තරගයේ පළමු ඉනිමේ දී හැර ඉතිරි තරග ඉනිම්වල දී සිය කණ්ඩායමේ පිතිකරුවන් ඇතුළු අනෙකුත් ක්‍රීඩකයි හොඳින් ක්‍රීඩා කළ බව ශ්‍රී ලංකා ටෙස්ට් ක්‍රිකට් කණ්ඩායමේ නායක ධනංජය ද සිල්වා පවසනවා.
පසුගියදා දකුණු අප්‍රිකාවට එරෙහිව පැවති දෙවැනි ටෙස්ට් තරගය ද ශ්‍රී ලංකා කණ්ඩායම ලකුණු 109කින් පරාජයට පත් වුණා.
තරගාවලිය ම ටෙස්ට් තරග 2 – 0ක් ලෙස පැරදුණු ශ්‍රී ලංකා ටෙස්ට් කණ්ඩායම අද (11) පෙරවරුවේ දිවයිනට පැමිණියා.
එහිදී වැඩිදුරටත් අදහස් දැක්වූ නායක ධනංජය ද සිල්වා පැවසුවේ; දකුණු අප්‍රිකාවේ පැවති දුෂ්කර තත්ත්වයන් යටතේ තම කණ්ඩායම මෙම තරගාවලියට ක්‍රීඩා කළ බවත්, තවමත් අපට ලෝක ටෙස්ට් ශූරතාවලිය පිළිබඳ බලාපොරොත්තු තබා ගත හැකි බවයි.
ඒ සඳහා ඉදිරි දිනවල ශ්‍රී ලංකාවේ පැවැත්වීමට නියමිත, ටෙස්ට් තරග දෙකකින් සමන්විත ශ්‍රී ලංකා – ඔස්ට්‍රෙලියා තරගාවලිය පිළිබඳ තමන් දැඩි බලාපොරොත්තු තබාගෙන ඇති බව ද හෙතෙම පැවසුවා.
ශ්‍රී ලංකා ටෙස්ට් ක්‍රිකට් කණ්ඩායම අද උදෑසන 08.22 ට ඩුබායි සිට එමිරේට්ස් ගුවන් සේවයේ ඊ.කේ.- 650 දරන ගුවන් යානයෙන් කටුනායක ගුවන් තොටුපොළ වෙත පැමිණියා.
