ජනාධිපති අනුර කුමාර දිසානායක ඇතුළු ජාතික ජන බලවේගය දිනූ විජයග්රහණයට කැනේඩියානු ද්රවිඩ කොංග්රසයෙන් සුබ පැතුම් පිරිනමා තිබෙනවා.
විශේෂ නිවේදනයක් නිකුත් කරමින් එම කොංග්රසයේ සභාපති කුමාර රත්නම් ප්රකාශ කර ඇත්තේ; එය ශ්රී ලංකාවේ දැවැන්ත දේශපාලනික දිශානතියකට පරිවර්තනය කිරීමට සාධනීය උත්සහායක් දරා ඇති බවයි.
කැනේඩියානු ද්රවිඩ කොංග්රසය නිකුත් කළ සම්පූර්ණ ලිපිය පහතින්…
”හිතවත් ජනාධිපති අනුර කුමාර දිසානායක මැතිතුමනි,
ජනාධිපති -ශ්රී ලංකා ප්රජාතාන්ත්රික සමාජවාදී ජනරජය;
ඔබගේ මැතිවරණ ජයග්රහණයට නැවත වරක් අපගේ හෘදයාංගම සුබ පැතුම් පිරිනැමීමට කැමැත්තෙමු. ඔබගේ නායකත්වය වැදගත් සන්ධිස්ථානයක් නියෝජනය කරන අතර, එය ශ්රී ලංකාව තුළ තිරසාර සාමයක් සඳහා තීරණාත්මක අවස්ථාවක් ලබා දෙන බව අපි විශ්වාස කරමු. විවිධ මුලපිරීම් හරහා ශ්රී ලංකාවේ ජනතාවගේ අභිවෘද්ධිය සඳහා දිගු කලක් තිස්සේ කැපවී සිටින සංවිධානයක් ලෙස කැනේඩියානු දෙමළ කොංග්රසය (CTC) මෙම වැදගත් කාර්යයට දායක වීමට සූදානමින් සිටී. කෙසේ වෙතත්, සංහිඳියාව සහ යුක්තිය සඳහා ඉතා වැදගත් වන ඇතැම් දිගුකාලීන ක්රියාමාර්ග තවමත් ගෙන නොතිබීම ගැන අපි කනස්සල්ලට පත්ව සිටිමු.
මේ සම්බන්ධයෙන්, එක්සත් ජාතීන්ගේ මානව හිමිකම් කවුන්සිලයේ 51/1 යෝජනාවට විරුද්ධ වීමට ගත් තීරණය විශේෂයෙන් අර්බුදකාරී බවක් නිර්මාණය කර ඇත. ජාත්යන්තර ප්රජාවගේ සහාය ඇති මෙම යෝජනාව ශ්රී ලංකාවේ වගවීම සහ යුක්තිය සඳහා තීරණාත්මක යාන්ත්රණයකි. එයට විරුද්ධ වීමෙන්, ඔබේ රජය දිගු කාලීන දුක්ගැනවිලි සහ යුක්තිය සහ මානව හිමිකම් පිළිබඳ මූලධර්ම නොසලකා හැරීමක් පිළිබඳ සංඥා කරයි. ජාත්යන්තර අධීක්ෂණය ප්රතික්ෂේප කිරීම තිරසාර විසඳුමක් ලබා නොදෙන අතර ඒ වෙනුවට අතීතයෙන් පීඩා විඳි අය අතර අවිශ්වාසය තීව්ර කරනු ඇත. ඔබේ පරිපාලනය අව්යාජ යුක්තිය වෙනුවෙන් කැපවී සිටී නම්, යෝජනාවට සහාය දීම දේශීයව සහ ගෝලීය වශයෙන් විශ්වාසය නැවත ඇති කිරීමේ මාවතක් ලෙස සැලකිය යුතුය. මේ සම්බන්ධයෙන් ඔබගේ ස්ථාවරය නැවත සලකා බලන ලෙස අපි ඔබගේ රජයෙන් ගෞරවයෙන් ඉල්ලා සිටිමු.
විශ්වාසය ගොඩනැගීමට, සංහිඳියාව ප්රවර්ධනය කිරීමට සහ රට පුරා සමානාත්මතාවයෙන් යුත් සංවර්ධනයක් සහතික කිරීමට පහත කඩිනම් පියවර ද අපි යෝජනා කරමු.
- ඉතිරිව සිටින සියලුම දේශපාලන සිරකරුවන් නිදහස් කරන්න.
- ඔබේ ප්රචාරක ප්රකාශනයේ දක්වා ඇති පරිදි ත්රස්තවාදය වැළැක්වීමේ පනත (PTA) අවලංගු කරන්න.
- මේ වනවිට උතුරු සහ නැගෙනහිර පළාත්වල ශ්රී ලංකා හමුදාව විසින් යටත් කරගෙන සිටින සියලුම පෞද්ගලික ඉඩම් ආපසු ලබාදීම සහ තවදුරටත් නීතිවිරෝධී ඉඩම් අත්පත් කර ගැනීම් නතර කරන්න.
- දෙමළ ජනයාගේ සංස්කෘතික හා ආගමික උරුමයන් සුරැකීම සහතික කිරීම සඳහා ඔවුන්ගේ ආගමික ස්ථාන ආක්රමණයන්ගෙන් ආරක්ෂා කිරීම සහ නව බෞද්ධ විහාරස්ථාන ඉදිකිරීම වැළැක්වීම මගින් දෙමළ ජනතාවගේ ආගමික අයිතිවාසිකම් තහවුරු කරන්න.
- 13 වැනි ව්යවස්ථා සංශෝධනය සම්පූර්ණයෙන් ක්රියාවට නංවා සියලු ජන කොටස් පිළිගන්නා නව ආණ්ඩුක්රම ව්යවස්ථාවක් සම්පාදනය කරන තෙක් පළාත් සභා මැතිවරණය නොපමාව පවත්වන්න. පළාත් පාලනය සහතික කිරීමට සහ කලාප සවිබල ගැන්වීම සඳහා බලය බෙදා හැරීම අත්යවශ්ය කාරණයක් ලෙස සලකන්න.
- උතුරු හා නැගෙනහිර පළාත්වල ආරක්ෂක අංශය ප්රතිසංස්කරණය කිරීම, එය රටේ සෙසු ප්රදේශවලට අනුකූල මට්ටමට ගෙන ඒම, ගොවිපොළවල්, හෝටල් සහ බේකරි වැනි වාණිජ කටයුතු සඳහා හමුදාවේ මැදිහත්වීම දේශීය ව්යවසාය අඩාල කරන බැවින් එය නතර කරන්න.
මෙම දැවැන්ත කාරණා සම්බන්ධයෙන් වහා සහ ස්ථිර පියවර ගන්නා ලෙස අපි ශ්රී ලංකා රජයෙන් දැඩි ලෙස ඉල්ලා සිටිමු. යුක්තිය සහතික කිරීම, සියලු ප්රජාවන් අතර විශ්වාසය ශක්තිමත් කිරීම සහ දිගුකාලීන ස්ථාවරත්වය පෝෂණය කිරීම සඳහා මෙම ගැටළු විසඳීම අත්යවශ්ය වේ. අඛණ්ඩව අකර්මණ්ය වීම රට තුළ සහ ජාත්යන්තර වශයෙන් සමානාත්මතාව සහ සාධාරණත්වය සඳහා රජයේ කැපවීම කෙරෙහි ඇති විශ්වාසය පළුදු කිරීම පමණි.
කැනේඩියානු දෙමළ කොංග්රසය, ගෝලීය පාර්ශ්වකරුවන් සමගින් ශ්රී ලංකාවේ සියලුම පුරවැසියන්ගේ අයිතිවාසිකම් සහ යහපැවැත්ම සඳහා සහාය වීමට කැපවී සිටී. රට තුළ ඇති වන වර්ධනීය තත්ත්වයන් සමීපව නිරීක්ෂණය කරන අතර අර්ථවත් ප්රගතියක් දැකීමට අපේක්ෂා කරමු. සියලුම ශ්රී ලාංකිකයන් සඳහා වඩාත් සාධාරණ අනාගතයක් සහතික කිරීම සඳහා ඔබේ රජය මෙම ක්රියාමාර්ගවලට ප්රමුඛත්වය දෙනු ඇතැයි අපි විශ්වාස කරමු.
ස්තුතියි!
ඔබේම විශ්වාසී,
කුමාර රත්නම්
සභාපති,
කැනේඩියානු දෙමළ කොංග්රසය.”
wpDiscuz
