එළඹෙන ජනාධිපතිවරණය සඳහා නිල ඡන්ද දැන්වීම් පත්‍රිකා සුරක්ෂිතව බෙදාහැරීම සහතික කිරීම සඳහා විශේෂ ආරක්ෂක වැඩපිළිවෙළක් ක්‍රියාත්මක කරන බව පොලිසිය පවසනවා.
මැතිවරණ කටයුතු පැවැත්වෙන දිස්ත්‍රික් ලේකම් කාර්යාල කේන්ද්‍ර කර ගනිමින් මෙම ආරක්ෂක වැඩපිළිවෙල ක්‍රියාත්මක කර ඇති බවයි පොලිසිය වැඩිදුරටත් සඳහන් කළේ.
මැතිවරණ කාලසීමාව තුළ සාමය සහ ආරක්‍ෂාව පවත්වාගෙන යාමේ සුවිශේෂී පියවරක් ලෙස මැතිවරණ රාජකාරි සඳහා පොලිස් නිලධාරීන් 54,000ක් යෙදවීමට නියමිතව ඇති බවයි වාර්තා වුණේ.
ජනාධිපතිවරණයට අදාළ නිල ඡන්ද දැන්වීම් පත්‍රිකා අද (02) දිනයේ තැපැල් දෙපාර්තමේන්තුව වෙත භාරදෙන බව මැතිවරණ කොමිෂන් සභාව නිවේදනය කර තිබුණා.
එම කොමිෂන් සභාවේ සභාපති ආර්.එම්.ඒ.එල්. රත්නායක තහවුරු කළේ බෙදාහැරීම සඳහා ඡන්ද කාඩ්පත් 17,140,354ක් ඇති බවයි.
දිස්ත්‍රික් ලේකම් කාර්යාලවල දී තේරීම් භාර නිලධාරීන් විසින් ඡන්ද දැන්වීම් පත්‍රිකා තැපෑලට භාරදෙන බව ද සභාපතිවරයා වැඩිදුරටත් සඳහන් කළා.
මේ අතර තැපැල් සේවකයින් 8,000ක් ඡන්ද දැන්වීම් පත්‍රිකා බෙදාහැරීම සඳහා අනුයුක්ත කර ඇති අතර, එම කටයුතු හෙට (03) දිනයේ සිට ආරම්භ වනවා.
