මාර්ග ගත(online ) ක්‍රමය හරහා මැණික් ව්‍යාපාර කටයුතු කරන චීන ජාතිකයෙකුට අයත් රුපියල් ලක්ෂ 28 ක් වටිනා මැණික් සොරකම් කර; අලෙවි කිරීමට උත්සාහ කළ පුද්ගලයකු අලුත්ගම පොලිසිය මගින් අත්අඩංගුවට ගෙන තිබෙනවා.
දසත ප්‍රාදේශීය වාර්තාකරු පැවසුවේ; අලුත්ගම – මොරගල්ල ප්‍රදේශයේ නිවසක් කුලියට ගෙන චීන ජාතකයින් පිරිසක් මෙම online ක්‍රමය හරහා මැණික් ව්‍යාපාර කටයුතු සිදුක රගෙන ගොස් ඇති බවයි.
මෙම ව්‍යාපාර කටයුතු කරන චීන ජාතිකයෙකුගේ වටිනා මැණික් ගල් කිහිපයක් අස්ථානගත වී ඇති බවට අලුත්ගම පොලිසියට කරන ලද පැමිණිල්ලකට අනුව මෙම විමර්ශන කටයුතු ආරම්භ කර තිබුණා.
සොරකම සම්බන්ධයෙන් පූර්ණ අධීක්ෂණයෙන් සිටි අලුත්ගම පොලිසියේ අපරාධ අංශයේ ස්ථානාධිපතිවරයා ඇතුළු කණ්ඩායම සොරකම් කරන ලද මැණික්; බේරුවල චීන කොටුව ප්‍රදේශයේ පිහිටි මැණික් වෙළෙඳපොළක් තුළ හුවමාරු වන බවට ලද තොරතුරු මත එම ස්ථානය අද (25) වැටලීමට ලක් කළා.
එහිදී අනාවරණය වී ඇත්තේ මෙම චීන ජාතිකයාගෙන් සොරකම් කරන ලද මැණික් බේරුවල මැණික් වෙළෙඳපොළට වෙනත් පුද්ගලයකුත් රැගෙන විත් එම මැණික් විකුණා දැමීමට උත්සාහ කරන බවටයි.
ඉන්පසුව මෙම මැණික් ගල් රැගෙන ආ පුද්ගලයා කළුතර උතුර ප්‍රදේශයේ පිහිටි ළැඟුම්හලක දී අලුත්ගම පොලිසිය මගින් අත්අඩංගුවට ගනු ලැබුවා.
අත්අඩංගුවට පත් සැකකරු මග්ගොන ප්‍රදේශයේ පදිංචි වයස 30 හැවිරිදි අයෙක්.
ඔහු එම ළැඟුම්හලේ ගබඩා භාරකරු ලෙස කටයුතු කරන පුද්ගලයා ද වනවා.
චීන ජාතිකයාගෙන් සොරකම් කරන ලද රුපියල් ලක්ෂ 28ක් පමණ වටිනාකම ඇති මැණික් ගල් 38ක් පොලිසිය විසින් සොයා ගනු ලැබුවා.
සැකකරු අද කළුතර මහේස්ත්‍රාත් අධිකරණයට ඉදිරිපත් කිරීමට නියමිතයි.
