ගුවන් සේවා නිලධාරිනිය ඝාතනය කළ සැකකරු විදෙස්ගත වීමට උත්සාහ කිරීමේදී ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් පිරිසක් විසින් අත් අඩංගුවට ගෙන තිබෙනවා.
ශ්‍රී ලංකා සිවිල් ගුවන් සේවා අධිකාරියේ සේවයේ නිරත 42 හැවිරිදි දුලාංජලී අනුරුද්ධිකා මහත්මිය ඝාතනය කළ මෙම පුද්ගලයා ඊයේ දින රාත්‍රී මැලේසියාව බලා පළා යාම සදහා කටුනායක ගුවන් තොටුපොළ වෙත පැමිණ සිටියදීයි මෙලෙස අත්අඩංගුවට පත්වී ඇත්තේ.
47 හැවිරිදි මෙම පුද්ගලයා පානදුර ප්‍රදේශයේ පදිංචිකරුවෙක්.
සකකරු ඊයේ රාත්‍රී 10.35ට පමණ මැලේසියාවේ ක්වාලාලම්පූර් නුවර බලා පිටත්ව යාමට නියමිත ගුවන් යානය සඳහා කටුනායක ගුවන් තොටුපොළ වෙත පැමිණ සිටියදී අත් අඩංගුවට ගනු ලැබුවා.
ඝාතනයට ලක්වූ දුලාංජලී අනුරුද්ධිකා මහත්මිය ශ්‍රී ලංකා සිවිල් ගුවන් සේවා අධිකාරියේ මූල්‍ය අංශයේ සේවයේ නිරතව සිටි අයෙක්.
වෛද්‍යවරයකු සමග විවාහවී සිටින ඇය එක් දරු මවක් වන අතර සිය සේවය නිමවා සිය නිවෙස වෙත යාම සඳහා කහතුඩුව අධිවේගී පිවිසුම වෙත පැමිණ සිටියදී මෙලෙස ඝාතනයට ලක්ව තිබුණා.
ඇය මඩපාත ප්‍රදේශයේ පදිංචිකාරියක්. අනියම් සබඳතාවයක් හේතුවෙන් මෙම ඝාතනය සිදුවන්නට ඇති බවටයි පොලිසිය සැක කරන්නේ.
සැකකරු වසර කිහිපයක් විදෙස් ගතව සිට පැමිණි අයෙක් බව ද අනාවරණ වී තිබෙනවා. සිද්ධිය සම්බන්ධයෙන් පරීක්ෂණ ක්‍රියාත්මකයි.
