තායිලන්තයේ සිට කටුනායක ගුවන් තොටුපොළ වෙත පැමිණි ගුවන් යානයක සිටි ගුවන් මගියෙකුගේ අත් බෑගය තුළ වූ මුදල් තොගයක් සොරා ගත් චීන ජාතිකයන් දෙදෙනෙකු ගුවන් තොටුපොළ පොලීසිය විසින් අත්අඩංගුවට ගෙන තිබෙනවා.
සැකකාර චීන ජාතිකයන් දෙදෙනා අද (07) උදෑසන මෙලෙස අත්අඩංගුවට ගෙන ඇති අතර, සොරාගත් මුදල්වලින් කොටසක් ද සොයාගෙන ඇති බවයි වාර්තා වුණේ.
ශ්රී ලංකාවේ සහ ඇමරිකාවේ ද්විත්ව පුපුරවැසිභාවය හිමි 71 හැවිරිදි පුද්ගලයෙක් රාගම ප්රදේශයේ පදිංචි තම ඥාතීන් බැලීමට අද දිවයිනට පැමිණ තිබෙනවා.
මෙම පුද්ගලයා අද (07) අලුයම 12.43ට තායිලන්තයේ බැංකොක් නුවර සිට තායි ගුවන් සේවයේ ටී.ජී.- 307 දරණ ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
ඔහු සිය ගමන් මල්ල ගුවන් යානයෙහි ගමන් මලු රාක්කයේ තබා නිදාගෙන පැමිණ ඇති අතර,එම ගුවන් යානයෙහි සිටි සැකකාර චීන ජාතිකයන් දෙදෙනාගමන් මල්ල තුළ වූ ඇමෙරිකානු ඩොලර් 2,000ක් සහ ශ්රී ලංකා රුපියල් 60,000ක මුදලක් සොරාගෙන තිබෙනවා.
මෙම සොරකම දුටු අනෙකුත් ගුවන් මගීන් මේ පිළිබද ගුවන් යානා කාර්යය මණ්ඩලය දැනුවත් කිරීමටයි පියවර ගෙන ඇත්තේ.
ඉන්පසුව ගුවන් යානය කටුනායක ගුවන් තොටුපොළ වෙත ගොඩබැස්ස වීමෙන් අනතුරුව ගුවන් යානා කාර්යය මණ්ඩලය විසින් මෙම චීන ජාතිකයන් දෙදෙනා ගුවන් තොටුපොළ ආරක්ෂක නිලධාරීන් වෙත භාර දී තිබෙනවා.
එහිදී ඔවුන් අත් අඩංගුවට ගෙන සිදුකළ විමර්ශනවල දී මොවුන් විසින් සොරා ගත් මුදල් වලින් කොටසක් සොයා ගැනීමට ද පොලීසිය සමත් තිබෙනවා.
මෙලෙස අත්අඩංගුවට ගෙන ඇත්තේ 369 සහ 39 යන වයස්වල පසුවන චීන ජාතිකයින් දෙදෙනෙක්.
අත්අඩංගුවට ගත සැකකාර චීන ජාතිකයින් දෙදෙනා සොරාගත් මුදල් ද සමඟ අද දිනයේ මීගමුව මහේස්ත්රාත් අධිකරණය වෙත ඉදිරිපත් කිරීමට නියමිතව තිබුණා.
.
