දිවයිනේ විවිධ ප්රදේශවලින් මෑතක සිට වාර්තා වන ගෘහස්ථ ගෑස් අනතුරු පිළිබඳ සොයාබලා ඒ සම්බන්ධයෙන් කඩිනමින් ගත හැකි විසඳුම් ඉදිරිපත් කිරීමට ජනාධිපති ගෝඨාභය රාජපක්ෂ මහතා විසින් කමිටුවක් පත්කර තිබේ.
ජනාධිපතිවරයා පෙන්වා දී ඇත්තේ ගෘහස්ථ, වෙළෙඳ හා විකුණුම් මධ්යස්ථානවල ගෑස් (LPG) සිලින්ඩර් ආශ්රිත ගිනිගැනීම්, පුපුරායාම් හා ඒ සඳහා හේතු සාධක සොයාබලා අදාළ විසඳුම් ඉදිරිපත් කරන ලෙසය.
මොරටුව විශ්වවිද්යාලයේ මහාචාර්ය ශාන්ත වල්පොළ මහතාගේ සභාපතිත්වයෙන් යුතු මෙම කමිටුවේ සෙසු සාමාජිකයන් ලෙස ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන්, මොරටුව විශ්වවිද්යාලයේ මහාචාර්ය අජිත් ද අල්විස්, ශ්රී ජයවර්ධනපුර විශ්වවිද්යාලයේ මහාචාර්ය ඩබ්.ඩී.ඩබ්. ජයතිලක, මහාචාර්ය ප්රදීප් ජයවීර, ශ්රී ලංකා නව නිපැයුම්කරුවන්ගේ කොමිසමේ කොමසාරිස් මහාචාර්ය නාරායන් සිරිමුතු, කාර්මික තාක්ෂණ ආයතනයේ අතිරේක අධ්යක්ෂ ජනරාල් ආචාර්ය සුදර්ශන සෝමසිරි, ශ්රී ලංකා ප්රමිති ආයතනයේ ජ්යෙෂ්ඨ නියෝජ්ය අධ්යක්ෂ සුජීව මහගම යන මහත්වරු ඒ සඳහා පත්කර ඇත.
අවශ්ය සියලු පාර්ශ්වයන්ගේ හා දැනට ඇති අධ්යනයන් හා විවිධ අදහස් විමර්ශනය කර, සති දෙකක් ඇතුළත වාර්තාව තමා වෙත ලබාදෙන ලෙස ජනාධිපතිවරයා කමිටුවට උපදෙස් දී තිබේ.