පවතින වැසි තත්වයත් සමඟ කළු ගඟෙහි කුඩා ගඟ උප ද්‍රෝණිය සඳහා නිකුත් කළ ගංවතුර අනතුරු ඇඟවීමේ නිවේදනය ඉදිරි පැය 24 දක්වා යළි දීර්ඝ කර තිබෙනවා.
ඒ සම්බන්ධයෙන් එම ප්‍රදේශවල පදිංචි ජනතාව මෙන්ම ප්‍රදේශය ඔස්සේ ගමන් ගන්නා රියදුරන් ද අවධානයෙන් පසුවිය යුතු බවයි වාරිමාර්ග දෙපාර්තමේන්තුව සිය නිවේදනය මගින් දැනුම්දී ඇත්තේ.
කළුතර දිස්ත්‍රික්කයේ මදුරාවල, පාලින්දනුවර, මිල්ලනිය සහ බුලත්සිංහල යන ප්‍රදේශවල මාර්ග කිහිපයක් තවදුරටත් ජලයෙන් යට වී පවතින බව වාර්තා වන්නේ.
එමෙන්ම කුකුළේ ගඟ සහ දැදුරු ඔය ජලාශයේ වාන් දොරටු තවදුරටත් විවෘත කර ඇති බව ද සඳහන්.
මේ අතර අයහපත් කාලගුණ තත්ත්වය හේතුවෙන් ගිං ගඟේ ඉහළ පෝෂක ප්‍රදේශයට අධික වර්ෂාවක් පතිත වීම ගිං ගඟේ ජල මට්ටම ඉහළ ගොස් තිබෙනවා.
අප ප්‍රාදේශීය වාර්තාකරු පැවසුවේ; ගඟේ සැඬ පහරට හසු වී ගසාගෙන ආ විශාල උණ ගස් ප්‍රමාණයක් තෙලිකඩ – ගාල්ල මාර්ගයේ වක්වැල්ල පාලමේ රැඳී ඇති අයුරු දක්නට ඇති බවයි.
මෙම උණ ගස් පාලමේ හිරවීම ගඟේ ජලය නිසි පරිදි ගලා යෑම අවහිර කර ඇති බවට ද තොරතුරු වාර්තා වනවා.
