රාජසන්තක කර තිබූ ගංජා කිලෝග්රෑම් නවයක් විනාශ කිරීම සම්බන්ධයෙන් මීයන්ට දොස් පැවරූ පුවතක් අසල්වැසි ඉන්දියාවෙන් වාර්තා වනවා.
ඉන්දියාවේ ධන්බාද් දිස්ත්රික්කයේ ජාර්කන්ඩ් පොලිස් ස්ථානයේ ගබඩාකර තිබූ ගංජා කිලෝග්රෑම් 09ක් මෙලෙස මීයන් විසින් විනාශ කර ඇති බවයි වාර්තා වන්නේ.
මීට වසර හයකට පෙර අත්අඩංගුවට ගත් මෙම ගංජා තොගය අධිකරණයට ඉදිරිපත් කරන ලෙස පොලිස් ස්ථානාධිපතිවරයාට නියෝග කිරීමෙන් පසු එම ගංජා තොගයට සිදුව ඇති දේ පොලිසිය විසින් වාර්තාවක් මඟින් අධිකරණයට ඉදිරිපත් කර තිබෙනවා.
පොලිස් ස්ථානයේ ගබඩාව තුළ ගබඩා කර තිබූ මත් ද්රව්ය මීයන් විසින් සම්පූර්ණයෙන්ම විනාශ කර ඇති බවයි පොලිසිය අදාළ වාර්තාව මඟින් ඊයේ දින අධිකරණයට දන්වා ඇත්තේ.
2018 දෙසැම්බර් 14 වන දින රාජ්ගන්ජ් පොලිසිය විසින් ෂම්බු ප්රසාද් අග්රවාල් නැමැති පුද්ගලයෙක් සහ ඔහුගේ පුත්රයා ගංජා කිලෝග්රෑම් නවයක් සමඟ අත්අඩංගුවටගෙන ඇති අතර, ඔවුන්ට එරෙහිව පොලිසිය මඟින් අධිකරණයේ දී නඩු පවරා තිබුණා.
එම නඩු විභාගයවන අතරතුර, රාජසන්තක කරන ලද ගංජා තොගය අප්රේල් 06 වනදා අධිකරණයට ඉදිරිපත් කරන ලෙස නඩුවේ විමර්ශන නිලධාරීන්ට අධිකරණය නියෝග කර ඇති බවයි වාර්තා වුණේ.
ඉන් අනතුරුව එම නිලධාරීන් විසින් කළ සොයාබැලීමේ දී එම ගංජා තොගයට සිදුව ඇති විනාශය දැක තිබෙනවා.
රාජසන්තක කරන ලද ද්රව්ය ඉදිරිපත් කිරීමට පොලිසියට නොහැකි වූ බැවින් තම සේවාදායකයා බොරු නඩුවලට හසුකර ඇති බව පෙනෙන බව සැකකරුවන් වෙනුවෙන් පෙනී සිටි නීතිඥයි අධිකරණය හමුවේ පවසා ඇති බව ඉන්දීය මාධ්ය වැඩිදුරටත් තොරතුරු වාර්තා කළා.
