විවෘත පාර්ලිමේන්තුවකට මූලා‍රම්භයක් සඳහා වූ පාර්ලිමේන්තු සංසදයේ සම සභාපතිවරුන් ලෙස මහාචාර්ය ක්‍රිෂාන්ත අබේසේන සහ ෂානක්කියන් රාජපුත්තිරන් රාසමාණික්කම් යන මහත්වරුන් පත් කර තිබෙනවා.
පාර්ලිමේන්තු සන්නිවේදන අංශය නිවේදනය කළේ; සංසදයේ කැඳවුම්කරු ලෙස පාර්ලිමේන්තු මන්ත්‍රී ජගත් මනුවර්ණ මහතා පත් වූ බවයි.
ඊට අමතර ව නියෝජ්‍ය සම සභාපතිවරු සිව්දෙනෙකු ද පත් කර තිබෙනවා.
දස වැනි පාර්ලිමේන්තුව සඳහා නැවත ස්ථාපනය කෙරුණු විවෘත පාර්ලිමේන්තුවකට මූලා‍රම්භයක් සඳහා වූ පාර්ලිමේන්තු සංසදයේ අභිනවයෙන් රැස්වීම ඊයේ (08) පාර්ලිමේන්තුවේ සිදු වුණා.
මෙහිදී සංසදයේ සම-සභාපතිවරුන් ලෙස අමාත්‍ය මහාචාර්ය ක්‍රිෂාන්ත අබේසේන මහතාගේ නම පාර්ලිමේන්තු මන්ත්‍රී වෛද්‍ය ජනක සේනාරත්න මහතා විසින් යෝජනා කළ අතර නීතිඥ භාග්‍ය ශ්‍රී හේරත් මහතා විසින් ස්ථිර කරනු ලැබුවා.
පාර්ලිමේන්තු මන්ත්‍රී ෂානක්කියන් රාජපුත්තිරන් රාසමාණික්කම් මහතාගේ නම විපක්ෂ නායක සජිත් ප්‍රේමදාස මහතා විසින් යෝජනා කළ අතර පාර්ලිමේන්තු මන්ත්‍රී නලින් බණ්ඩාර මහතා විසින් ස්ථිර කරනු ලැබුවා.
මෙම සංසදයේ කැඳවුම්කරු ලෙස පාර්ලිමේන්තු මන්ත්‍රී ජගත් මනුවර්ණ මහතා තේරී පත්වූ අතර නියෝජ්‍ය සම සභාපතිවරුන් ලෙස නීතිඥ චමින්ද්‍රාණී කිරිඇල්ල, චන්දන සූරියආරච්චි, එස්. එම්. මරික්කාර් සහ නීතිඥ තුෂාරි ජයසිංහ යන මහත්ම මහත්මීන් තේරී පත් වුණා.
මෙම සංසදය අමතමින් අභිනවයෙන් පත්වූ සම සභාපතිවරුන් සඳහන් කළේ පාර්ලිමේන්තුව මහජනතාවට සමීප කරලීම වෙනුවෙන් සංසදය හරහා සිදු කළ හැකි සියලු කටයුතු සිදු කිරීමට බලාපොරොත්තු වන බවයි.
එසේම පොදු ව්‍යාපාර පිළිබඳ කාරක සභාවේ සභාපති ලෙස පාර්ලිමේන්තු මන්ත්‍රී නිශාන්ත සමරවීර මහතා ඒකමතිකව තේරී පත් වුණා.
