සුඛෝපභෝගී නවීන වෑන් රථයකින් ගොස් දිවයිනේ ප්‍රදේශ රැසක වෙළඳසැල් කඩා රුපියල් කෝටියකට අධික පූජා භාණ්ඩ සොරකම් කළ කණ්ඩායමක සාමාජිකයන් තුන් දෙනෙකු අත්තනගල්ල පොලිසිය විසින් අත්අඩංගුවට ගෙන තිබෙනවා.
අත්අඩංගුවට ගත් සැකකරුවන් පානදුර උතුර ප්‍රදේශයේ පදිංචි වයස අවුරුදු 35 සහ 45 වයස්වල පසුවන්නන් බවයි පොලිසිය සඳහන් කළේ.
පසුගිය සැප්තැම්බර් මස 29 වනදා අත්තනගල්ල විහාරස්ථානය ඉදිරිපිට පිහිටි පූජා භාණ්ඩ අලෙවි සැලක් කඩා එහි තිබූ රුපියල් 4,750,000ක පූජා භාණ්ඩ සොරකම් කිරීම සම්බන්ධව වෙළඳසැල් හිමිකරු විසින් කළ පැමිණිල්ලක් මත CCTV දර්ශන ඔස්සේ විමර්ශනය කර සොරකම් කිරීමට යොදාගත් වෑන් රථය පානදුර ප්‍රදේශයේ දී අත්අඩංගුවට ගෙන තිබෙනවා.
අදාළ වෑන් රථයේ අංක තහඩු වෙනස් කර තිබූ අතර එම අංක තහඩුවලට අදාළ අංකය ඌව පළාත් සභාවට අයත් කැබ් රථයක අංකයක් බවටයි විමර්ශනවලදී හෙළිවී ඇත්තේ.
පසුව වෑන් රථයේ හිමිකරු අත්අඩංගුවට ගෙන කළ ප්‍රශ්න කිරීම්වලදී ලැබුණු තොරතුරු මත තවත් සැකකරුවන් දෙදෙනකු ද අත්අඩංගුවට ගෙන තිබෙනවා.
සැකකරුවන් බණ්ඩාරගම ප්‍රදේශයේ වෙළඳසැලකින් රුපියල් ලක්ෂ 50කට අධිකට අධික පූජා භාණ්ඩ සහ රෙදිපිළි සොරාගෙන ඇති බවත් මීගොඩ ප්‍රදේශයේ පූජා භාණ්ඩ අලෙවි සැලක් බිඳ රුපියල් 550000ක රෙදි පිළි සහ පූජා භාණ්ඩ සොරාගෙන ඇති බවත් විමර්ශනවලින් හෙළි වී ඇතැයි සඳහන්.
එලෙස සොරා ගන්නා ලද අටපිරිකර, සිවුරු,වටාපත් ඇතුළු පූජා භාණ්ඩ තොගයක් ද පොලිස් භාරයට ගෙන තිබෙනවා.
මෙම කණ්ඩායමේ තවත් සැකකරුවන් දෙදෙනෙකු ද අත්අඩංගුවට ගැනීමට විමර්ශන ආරම්භ කර ඇති බවයි අත්තනගල්ල පොලිසිය කියාසිටියේ.
අත්අඩංගුවට ගත් සැකකරුවන් තිදෙනා හෙට (12) අත්තනගල්ල මහේස්ත්‍රාත් අධිකරණයට ඉදිරිපත් කිරීමට නියමිතයි.
අත්තනගල්ල පොලිසිය සිද්ධිය සම්බන්ධයෙන් වැඩිදුර විමර්ශන සිදු කරනවා.
