කොල්ලුපිටියේ දී ඊයේ (24) පස්වරුවේ පොලිස් නිලධාරීන් හා තරුණයින් කිහිප දෙනෙකු අතර ඇති වූ බහින් බස් වීමක් පිළිබඳ ව වීඩියෝ පට කිහිපයක් මේ වන විට සමාජ මාධ්‍ය ඔස්සේ සංසරණය වෙමින් තිබෙනවා.
කෙසේ වෙතත් මෙම සිදුවීම සම්බන්ධයෙන් විධිමත් පරීක්ෂණයක් සිදු කරන බවයි පොලිස් මාධ්‍ය ප්‍රකාශකවරයා සඳහන් කළේ.
කොල්ලුපිටියේ දී රථ වාහන සෝදිසි මෙහෙයුමේ නිරත පොලිස් නිලධාරින් කිහිප දෙනෙකු විසින් ඒ අසලින් ගමන් ගත් වෑන් රථයක් ඊයේ පස්වරුවේ සෝදිසි කිරීමට ලක්කර තිබෙනවා.
එහිදී වාහනය පරික්ෂා කරන අතරේ එහි තිබී මත්ද්‍රව්‍ය හා ඊට සමාන යමක් සොයාගත් බවයි පොලිසිය සදහන් කර ඇත්තේ.
කෙසේ වෙතත් වාහනයේ ගමන් ගත් පිරිස චෝදනා කළේ පොලිස් නිලධාරින් විසින් වාහනය පරික්ෂා කරන අතරේ ඊට මෙම මත්ද්‍රව්‍ය දමා ඇති බවයි.
ඒත් සමග දෙපාර්ශ්වය සමග ඇති වූ මතභේදාත්මක තත්ත්වය දැක්වෙන දර්ශන පෙළක් අන්තර්ජාලයේ මේ වන විට සැරිසරනවා.
කෙසේ වෙතත් මේ සම්බන්ධයෙන් අප කළ විමසීමක දී කොල්ලුපිටිය පොලිසිය සඳහන් කළේ වාහනයේ ගමන් කළ පිරිස් ඔවුන්ට එල්ල වූ චෝදනාවෙන් ගැලවීම සඳහා මෙවැනි අසත්‍ය ප්‍රචාරයක් සිදු කරන බවයි.
සිද්ධිය සම්බන්ධයෙන් කිසිදු පුද්ගලයෙක් මෙතෙක් අත්අඩංගුවට ගෙන නොමැති බව ද පොලිසිය පැවසුවා.
මේ අතර පොලිස් මාධ්‍ය ප්‍රකාශකවරයා සඳහන් කර සිටියේ සිද්ධිය සම්බන්ධයෙන් වැඩිදුර විමර්ශන කටයුතු සිදු කරන බවයි.
