කොල්ලකා පලායමින් තිබූ මෝටර් රථයකට කොටහේන, බ්ලූමැන්ඩල් ප්රදේශයේ දී පොලිසිය විසින් වෙඩි තැබීමක් සිදුකර තිබෙනවා.
ඊයේ (12) රාත්රියේ මෙම මෝටර් රථය කොල්ලකා ඇති අතර, වෙඩි ප්රහාරයෙන් පසු කොල්ලකරු මෝටර් රථය අතහැර පලාගොස් ඇති බවයි පොලිසිය සඳහන් කළේ.
වාසල පාර, කොටහේන වීදිය ප්රදේශයේ දී තම ගැබිණි බිරිඳ සහ මව සමඟ මෝටර් රථයකින් පැමිණි පුද්ගලයෙක් මෝටර් රථය නවතා එහි එන්ජිම පණ ගන්වා තිබිය දී කොටහේන ප්රදේශයේ අවන්හලකට ආහාර මිල දී ගැනීමට ගොස් තිබෙනවා.
එම අවස්ථාවේ දී මෝටර් රථයට නැඟි පුද්ගලයෙක් මෝටර් රථය තුළ බිරිඳ සහ මව සිටියදීම රථය කොල්ල කා පලාගොස් ඇති බවයි වාර්තා වන්නේ.
මෙම කොල්ලකෑම සම්බන්ධයෙන් මට්ටක්කුලිය පොලිස් ස්ථානයේ නිලධාරීන් පිරිසකට තොරතුරක් ලැබී ඇති අතර, වහාම ක්රියාත්මක වූ එම නිලධාරීන් මෝටර් රථය ලුහුබැඳ ඇති බවයි වාර්තා වුණේ.
එහිදී මෝටර් රථය නතරකරන ලෙසට නිලධාරීන් සඥාකර ඇති අතර, එම පොලිස් අණ නොතකා කොල්ලකරු මෝටර් රථය ධාවනය කර තිබෙනවා.
එම අවස්ථාවේ දී පොලිස් නිලධාරීන් පිස්තෝල ගිනි අවියකින් මෝටර් රථයකට වෙඩි ප්රහාර දෙකක් එල්ලකර ඇති අතර, එහිදී බ්ලූමැන්ඩල් දුම්රිය හරස් මාර්ගයේ දී මෝටර් රථය නතරකර ගැනීමට පොලිසියට හැකිව තිබෙනවා.
කෙසේ වෙතත් පොලිස් නිලධාරීන් මෝටර් රථය අසලට පැමිණෙන අවස්ථාවේ දී කොල්ලකරු ඉන් බැස පලාගොස් ඇති බවයි පොලිසිය පැවසුවේ.
මෝටර් රථය තුළ සිටි කාන්තාවන් දෙදෙනාට කිසිඳු හානියක් සිදුව නොමැති අතර, පලාගිය සැකකරු සොයා පොලිස් විමර්ශන ක්රියාත්මක කෙරෙනවා.
