කුවේට් රාජ්‍යයේ ගෘහ සේවය සඳහා ගොස් සිටියදී විවිධ හිංසනවලට ලක්ව සිටි තවත් ශ්‍රී ලාංකික ගෘහ සේවක සේවිකාවන් පිරිසක් අද යළි මෙරටට පැමිණ තිබෙනවා.
කුවේටයේ ගෘහ සේවය සදහා ගොස් එරට හාම්පුතුන් අතින් විවිධ කරදර හිරිහැරවලට ලක් වූ මෙන්ම විවිධ රෝගාබාධයන්ට ගොදුරු වී සිටි මෙම ශ්‍රී ලාංකිකයන් පිරිස නිවෙස් වල මතු වී තිබූ ගැටළු මත පැමිණීමට නොහැකිව සිටි බව සඳහන්.
මෙසේ පැමිණි පිරිස අතරින් ගෘහ සේවිකාවන් 42 දෙනෙකු සිටි අතර ඉතිරි 05 දෙනා සේවකයින්.
ඔවුන් අතරින් වැඩි පිරිසක් අනුරාධපුර දිස්ත්‍රික්කය තුළ පදිංචිකරුවන් වීම ද විශේෂත්වයක්.
අද උදෑසන 06.40ට ඕමානයේ මස්කට් නුවර සිට ශ්‍රී ලන්කන් ගුවන් සේවයේ යූ.එල්.- 230 දරන ගුවන් යානයෙන් කටුනායක ගුවන් තොටුපළ වෙත පැමිණ තිබුණා.
තවත් ශ්‍රී ලාංකික ගෘහ සේවිකාවන් 1,300ක පමණ පිරිසක් ශ්‍රී ලංකාවට පැමිණීමට නොහැකිව කුවේටයේ රැදී සිටින බව එරට ශ්‍රී ලංකා තානාපති කාර්යාලයේ තෙවන ලේකම් ජනක සමරසේකර මහතා අනාවරණය කර තිබෙනවා.
ශ්‍රී ලංකාවට පැමිණීමට අපේක්ෂාවෙන් සිටින මෙම ගෘහ සේවිකාවන් කඩිනමින් ශ්‍රී ලංකාවට එවීමට කටයුතු කරන බවයි ඔහු වැඩිදුරටත් ප්‍රකාශ කළේ.
අද මෙරටට පැමිණි පිරිස අතරින් වැඩි දෙනෙකු තම හාම්පුතුන් අතින් විවිධ හිරිහැර කරදරවලට ලක් වීමෙන් පසු, ඔවුන්ට හිමි වැටුප් පවා ලැබී නොමැති අතර, ඔවුන් අවසානයේ එතෙක් සේවය කළ නිවාසවලින් පළා විත් ශ්‍රී ලංකා තානාපති කාර්යාලයේ රැඳී සිට තිබෙනවා.
මෙවන් පසුබිමක් යටතේ එරට රජය විසින් මෙම ශ්‍රී ලාංකික ගෘහ සේවිකාවන් කුවේටයෙන් පිටව යෑම තහනම් කරමින් ගුවන් ගමන් තහනමක් (Runway Case ) පැනවීමක් සිදු කරනු ලබන බව සඳහන්.
මේ හේතුවෙන් මෙම ශ්‍රී ලාංකික ගෘහ සේවිකාවන් ශ්‍රී ලංකා තානාපති කාර්යාලය සහ විදේශ සේවා නියුක්ති කාර්යාංශය මැදිහත් වී, එරට බන්ධනාගාරය වෙත පැය 72ක කාලයක් සදහා යොමු කර, කුවේටයේ අපරාධ පරීක්ෂණ දෙපාර්තමේන්තු නිලධාරීන් සමග සාකච්ඡා කර, ඔවුන් වෙත පනවා තිබූ ගුවන් ගමන් තහනම ඉවත් කර ගැනීමෙන් පසුවයි මෙරටට එවීමට පියවර ගෙන ඇත්තේ.
