කිවි – සිංහ එක්දින තරගාවලිය හෙට ඇරඹෙයි

සංචාරක ශ්‍රී ලංකා කණ්ඩායම සහ සත්කාරක නවසීලන්තය අතර පැවැත්වෙන තරග තුනකින් සමන්විත එක්දින තරගාවලිය හෙට (05) අලුයම ආරම්භ වනවා.

දේශීය වේලාවෙන් අලුයම 3.30ට දෙරට අතර තරගය ආරම්භ වන්නේ වෙලින්ග්ටන් හිදීයි.

ශ්‍රී ලංකා එක්දින කණ්ඩායමේ ද නායකත්වය චරිත් අසලංක විසින් දරනු ලබන අතර නවසීලන්ත නායකත්වය දරන්නේ මිචෙල් සැන්ට්නර් යි.

නවසීලන්තය සහ ශ්‍රී ලංකාව අතර එක්දින තරග 105ක් පවත්වා තිබෙනවා.

ඉන් වැඩි වාසි හිමිකරගෙන ඇත්තේ නවසීලන්තය යි.

ඔවුන් ශ්‍රී ලංකාව පරදා එක්දින තරග 52ක් ජයගෙන ඇති අතර තරග 43ක ජය හිමි ව ඇත්තේ ශ්‍රී ලංකාවටයි.

නවසීලන්තය ශ්‍රී ලංකාවට එරෙහිව මව්බිමේදි එක්දින තරග 30ක් ජයගෙන තිබෙනවා.

ශ්‍රී ලංකාව සිය මව්බිමේ දී දිනා ඇත්තේ තරග 19ක් පමණයි.

එබැවින් හෙට පැවැත්වෙන එක්දින තරගාවලිය ශ්‍රී ලංකාවට බෙහෙවින් වැදගත් වනවා.

දෙරට අතර පැවති පන්දුවාර 20 තරගාවලියේ ශූරතාව ද තරග 2-1ක් ලෙස හිමිකරගත්තේ සත්කාරක නවසීලන්තයයි.

ශ්‍රී ලංකාව වෙනුවෙන් හෙට තරගාවලියේ සංචිතයට ජෙෆ්‍රි වැන්ඩර්සේ, දුනිත් වෙල්ලාලගේ, එෂාන් මාලිංග, මොහොමඩ් ශිරාෆ්, ජනිත් ලියනගේ, නුවනිඳු ප්‍රනාන්දු ද කැඳවා තිබෙනවා.