කැලණි ශ්‍රී පාද පෙරහැරට සියල්ල සූදානම් – සල්ලි නැතිව මල් විතරක් දෙන්න

කැලණියේ ශ්‍රී පාද පෙරහැර මෙවරත් අති උත්සවශ්‍රීයෙන් යුතුව පැවැත්වීමට සියලු කටයුතු සූදානම් කර තිබෙනවා.

කැලණි ශ්‍රී පාද පෙරහැර එකමුතුව විශේෂ නිවේදනයක් නිකුත් කරමින් සඳහන් කරන්නේ; ගෞතම ශ්‍රී පාද වන්දනා වාරය ආරම්භ කරමින් සහ කැලණි රජමහා විහාරයේ සිට ශ්‍රී පාදස්ථානය වෙත සම්මා සම්බුදුරජාණන් වහන්සේ වැඩම කිරීම සිහිකරමින් උතුම් කේෂ ධාතූන් වහන්සේලා හා සර්වඥ ධාතූන් වහන්සේලා තැන්පත් සධාතුක කරඬුන් වහන්සේ වැඩම කිරීමේ පෙරහැර දෙසැම්බර් මස 12 වැනි දිනදා උදෑසන 5.30ට කැලණි රජ මහා විහාරයෙන් ගමන් ආ‍රම්භ කිරීමට නියමිතයි.

කඩුවෙල, පාදුක්ක, ඉංගිරිය රත්නපුර හරහා පැල්මඩුල්ල ශ්‍රී පාද රජමහා විහාරය වෙත එදින රාත්‍රියට එම පෙරහැර වැඩම කිරීමට නියමිත බවත් වාර්තා වනවා.

දෙසැම්බර් 13 වන දින පැල්මඩුල්ල ශ්‍රී පාද රජමහා විහාරස්ථානයේ සිට සුමන සමන් දේව ප්‍රතිමාව සහ දේවාභරණ රැගත් පෙරහැර ද සමගින් එකම පෙරහරක් ලෙස ගමන් ආරම්භ කර ගෞතම ශ්‍රී පාදස්ථානය වෙත ගමන් කරනු ලබන අතර 14 වන දින ගෞතම ශ්‍රී පාද පද්ම කුටියේ එම සධාතුක ධාතු කරඬු වහන්සේ තැන්පත් කිරීමට නියමිතයි.

“කැලණි ශ්‍රී පාද පෙරහර එකමුතුව” සංවිධානය විසින් මෙම උතුම් කේෂ ධාතූන් වහන්සේලා හා සර්වඥ ධාතූන් වහන්සේලා තැන්පත් සධාතුක කරඬු වහන්සේ වැඩම කිරීමේ පෙරහැර සංවිධානය කරනු ලබනවා.

මග දෙපස සිටින බැතිමතුන්ගෙන් සංවිධායක මණ්ඩලය ඉල්ලා සිටින්නේ; මුදල් පරිත්‍යාගවලින් වැළකී මල් පමණක් සධාතුක කරඬු වහන්සේ වෙත පූජා කරන ලෙසයි.

මේ අතර මෙවර ශ්‍රී පාද වාරය දෙසැම්බර් 14 උඳුවප් පොහෝ දිනයෙන් ආරම්භ වනු ඇති.