තායිලන්තයේ පැවති කායවර්ධන ක්ෂේත්‍රයේ වෘත්තීය මට්ටමේ ක්‍රීඩිකාවන් සහභාගී වූ ‘I FBB Pro League’ තරගාවලියට උස සෙන්ටි මීටර් 168 වඩා උස කාණ්ඩයේ කාන්තා ෆිෂික්ස් ( Woman Physique ) අංශය යටතේ තරග කර, එම ඉසව්වෙන් දෙවන ස්ථානය දිනාගෙන රිදී පදක්කමක් හිමි කර ගත් තාරකා සඳරේණු පෙරේරා ක්‍රීඩිකාව දිවයිනට පැමිණ තිබෙනවා.
ඇය ඊයේ (02) රාත්‍රීයේදී කටුනායක ගුවන් තොටුපොළ වෙත තායිලන්තයේ බැංකොක් නුවර සිට එයාර් ඒෂියා ගුවන් සේවයේ එෆ්.ඩී.- 140 දරන ගුවන් යානයෙන් මෙරටට පැමිණියා.
මෙම තරගාවලිය නොවැම්බර් මස 30 වැනි දින ලෝකයේ වෘත්තීය මට්ටමේ කායවර්ධන ක්‍රීඩිකාවන් 400කගේ පමණ සහභාගීත්වයෙන් තායිලන්තයේ බැංකොක් නුවර පැවැත්වුණා.
කළුතර ප්‍රදේශයේ පදිංචි 26 හැවිරිදි මෙම ශූරියට, මෙම ජයග්‍රහණයත් සමග අමෙරිකා එක්සත් ජනපදයේ පවත්වන “ඔලිම්පියා” ජාත්‍යන්තර කායවර්ධන ශූරතා තරගාවලියට සහභාගී වීමේ අවස්ථාව ද හිමි වී තිබෙනවා.
මෙම ක්‍රීඩිකාව ඉකුත් 2022 වසරේ පැවති ජාතික ආධුනික කායවර්ධන ශූරතා තරගාවලියේ දී ජාතික ශූරිය බවට පත් වූ තැනැත්තිය ද වනවා.
