වෙඩිවැදී මියගිය පාතාල කල්ලි සාමාජිකයෙකු වූ ගනේමුල්ලේ සංජීව නමැත්තාගේ ඝාතන සැකකරු ලෙස මොහොමඩ් අසාම් සිරබ්ඩීන් ලෙස නම් කර ඔහුගේ ඡායාරූප මාධ්‍ය වෙත මුදා හැරීම හේතුවෙන් මොහොමඩ් අසාම් සිරබ්ඩීන්ගේ පවුලේ ඥාතීන්ට අගතියක් සිදු වී ඇති බවට මෝසමක් කොළඹ ප්‍රධාන මහේස්ත්‍රාත් අධිකරණය වෙත අද (20) ඉදිරිපත් කළා.
මොහොමඩ් අසාම් සෙරෙඩ්ඩීම් යන අයගේ සහෝදරයෙකු විසින් ගොනු කළ මෙම මෝසම නීතිඥ නුවන් ජයවර්ධන මහතා මගින් අධිකරණයට ඉදිරිපත් කරනු ලැබුවා.
මෝසම සම්බන්ධයෙන් නීතිඥ දසුන් පෙරේරා මහතා අධිකරණයට කරුණු ඉදිරිපත් කරමින් කියා සිටියේ දැනට පොලිසිය මගින් අත්අඩංගුවට ගෙන ඇති සැකකරු මොහොමඩ් අසාම් සෙරෙබ්ඩීම් නොවන බවයි.
එමෙන්ම ඝාතකයාගේ රුව නිසියාකාරව සීසීටීවී දර්ශන මගින් හඳුනා ගැනීමට පෙර පොලිස් මාධ්‍ය ප්‍රකාශකවරයා ප්‍රකාශ කළ සැකකරුගේ නම හා පුත්තලම ප්‍රදේශයේ දී අත්අඩංගුවට ගත් සැකකරු එක් අයෙකු නොව දෙදෙනකු බවයි.
ඒ ආකාරයට ඝාතකයා ලෙස සිය සේවාදායකයාගේ සොහොයුරාගේ නම හා ඡායාරූපය පල කිරිමෙන් එම පවුලට අගතියක් සිදු වූ බව නීතිඥවරයා අධිකරණයට පෙන්වා දුන්නා.
මේ හේතුවෙන් නම සඳහන් වූ සැකකරුගේ පවුලේ ඥාතීන්ට නීතිමය ප්‍රශ්න හා සමාජයේ ප්‍රශ්න ඇති වී ඇති බවත්, ඒ අවස්ථාවේ සිට පොලිසිය නිවසට පැමිණ ඔහුගේ යතුරුපැදිය පවා රැගෙන ගිය බවත්, ඒ සම්බන්ධයෙන් සුදුසු නියෝගයක් කරන ලෙසත් ඉල්ලා සිටියා.
ඉදිරිපත් වූ කරුණු සලකා බැලූ ප්‍රධාන මහේස්ත්‍රාත් තනුජා ලක්මාලී මහත්මිය සිද්ධියට අදාළ සැකකරු තවමත් අධිකරණයට ඉදිරිපත් කර නොමැති හෙයින් අදාළ ඉල්ලීම සැකකරු ඉදිරිපත් කරන අවස්ථාවේ අධිකරණයට ඉදිරිපත් කරන ලෙසට නීතිඥවරුන්ට දන්වා සිටියා.
එහිදී කෙසෙල්වත්ත පොලිසිය සඳහන් කළේ මෙම සිද්ධිය සම්බන්ධයෙන් අවශ්‍ය පියවර ගෙන ඒ පිළිබඳව අධිකරණයට දැනුම්දෙන බවයි.
