කාන්තා වෙස්ගෙන සොරකමේ ගිය අයෙක් කළුතර දී අල්ලයි

කාන්තාවක් ලෙස සැරසී සොරකමේ ගිය පුද්ගලයෙකු කළුතර උතුර පොලිසිය විසින් ඊයේ (26) අත්අඩංගුවට ගෙන තිබෙනවා.

අදාල පුද්ගලයා දිගු කොණ්ඩයක් වවාගෙන, සාරියකින් සැරසී නිවෙස්වලට හොර රහසේ ඇතුළු වී මෙලෙස භාණ්ඩ සොරාගෙන ඇති බවයි අනාවරණය වී ඇත්තේ.

අත්අඩංගුවට ගැනුණු සැකකරු කළුතර, ලාගෝස්වත්ත ප්‍රදේශයේ පදිංචි 40 හැවිරිදි වියේ පසුවන අයෙක් බවයි පොලිසිය සඳහන් කළේ.

මොහු විසින් නිවෙස්වලින් සොරා ගන්නා ලද රයිස් කුකර්, වතුර මෝටර්, බෆල්, පිත්තල මල්වාස් සහ පිඟන් කෝප්ප ඇතුළු භාණ්ඩ රැසක් සොයා ගැනීමට පොලිසියට හැකිව තිබෙනවා.

තවද සොරකමේ යාම සඳහා කාන්තාවක් ලෙස සැරසීමට යොදාගත් සාරි කිහිපයක් ද සොයාගෙන ඇති බව පොලිසිය සඳහන් කළේ.

සැකකරු කළුතර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණා.