කැකිරාව සෞඛ්ය වෛද්ය නිලධාරිවරයාට මරණ තර්ජන එල්ල කරමින් පෝස්ටර් ප්රදර්ශනය කර; එම නිල රාජකාරි ස්ථානයට කළු තෙල් ප්රහාරයක් එල්ල වී තිබෙනවා.
මෙම සිදුවීම පිළිබඳ ව කැකිරාව සෞඛ්ය වෛද්ය නිලධාරී කාර්යාලය විසින් කැකිරාව පොලිස් ස්ථානයට පැමිණිල්ලක් ද සිදු කරනු ලැබූ අතර; ඉන්පසුව විමර්ශන ආරම්භ වී ඇති බවයි වාර්තා වන්නේ.
මෙම සෞඛ්ය වෛද්ය නිලධාරිවරයාට වහාම එම බල ප්රදේශයෙන් ඉවත් ව යන ලෙසත්; එසේ නොවුණහොත් පසුගියදා අතුරුගිරියේ දී ඝාතනය වූ ක්ලබ් වසන්ත නමැත්තාට අත් වූ ඉරණම ම අත්වන බවත් එම පෝස්ටර්වල සඳහන් බව අප ප්රාදේශීය වාර්තාකරු පැවසුවා.
කැකිරාව සෞඛ්ය වෛද්ය නිලධාරී කාර්යාලයේ ගොඩනැගිලි 03කට මෙම කළු තෙල් ප්රහාරය එල්ල වී තිබෙනවා.
මේ හේතුවෙන් පරීක්ෂණ සඳහා ඊයේ (14) දිනයේ දී එම කාර්යාලය පොලිස් ආරක්ෂාව මත වසා දමා ඇති බවයි පැවසෙන්නේ.
රුපියල් කෝටි ගණනක් වටිනා විෂ මිශ්රිත පාන්පිටි තොගයක් අත්අඩංගුවට ගැනීම හා කිරි ආශ්රිත නිෂ්පාදන කර්මාන්ත ශාලාවක් සම්බන්ධයෙන් මෙන් ම සෞඛ්ය වෛද්ය නිලධාරී කාර්යාලය මගින් භාරයට ගෙන තිබූ ආහාර ද්රව්ය තොගයකට හානි කිරීම සම්බන්ධන්ධයෙන් නීතිඥවරුන් දෙදෙනෙකුට ද එරෙහි ද කැකිරාව සෞඛ්ය වෛද්යවරයා විසින් මේ වනවිට අධිකරණයේ නඩු පවරා එම නඩු විභාග වෙමින් ඇති පසුබිමකයි මෙම මරණ තර්ජන ඔහුට එල්ල ව ඇත්තේ.
මෙම සිද්ධිය සම්බන්ධයෙන් අනුරාධපුර ප්රාදේශීය සෞඛ්ය අධ්යක්ෂ කාර්යාලය මගින් ද විමර්ශනයක් ආරම්භ කර තිබෙනවා.
සිද්ධිය සම්බන්ධයෙන් අනුරාධපුර පොලිස් විමර්ශන ක්රියාත්මකයි.
