කඩා වැටුණු ජෙට් යානයෙන් පැන්න පුහුණු උපදේශකවරයා විදුලි රැහැනක ගැටිලා

ශ්‍රී ලංකා ගුවන් හමුදාවට අයත් K-8 වර්ගයේ ප්‍රහාරක පුහුණු ගුවන් යානයක් වාරියපොළ, මිනුවන්ගැටේ ප්‍රදේශයට කඩාවැටීමෙන් අද (21) පෙරවරුවේ අනතුරක් සිදු වුණා.

මෙම අනතුරින් යානය සම්පූර්ණයෙන්ම ගිනි ගෙන විනාශ වූ අතර, එහි සිටි නියමුවන් දෙදෙනා ජීවිත බේරාගැනීමට සමත් වුණා.

ඒ, අනතුර සිදුවන අවස්ථාවේ දී ඔවුන් දෙදෙනා විසින් පැරෂුට් ආධාරයෙන් ආරක්ෂිතව ඉන් ඉවත් වී තිබීම හේතුවෙන්.

එලෙස පැරෂුට් ආධාරයෙන් යානයෙන් පිටතට පැන තිබූ නියමුවන් දෙදෙනා මිනුවන්ගැටේ ප්‍රදේශය ආසන්නයේ පිහිටි අවුලේගම, සුන්දරගම විද්‍යාලය අසලට ගොඩබැස තිබුණා.

එලෙස ගොඩබැසීමේ දී ප්‍රධාන පුහුණු උපදේශකවරයා ලෙස කටයුතු කළ නියමුවා විදුලි රැහැනක ගැටී ඇති අතර එහිදී ඔහුට තුවාල සිදුව තිබෙනවා.

පසුව ප්‍රදේශවාසීන් විසින් සුවසැරිය ගිලන් රථයකින් නියමුවන් දෙදෙනා කුරුණෑගල රෝහලට ඇතුළත් කිරීමටයි කටයුතු කර තිබුණේ.

යානය පුහුණු පියාසැරියක් සඳහා අද උදෑසන කටුනායක ගුවන්තොටුපොළින් ගුවන්ගත කර ඇති අතර, එය අනතුරට ලක්ව ඇත්තේ උදෑසන 7.55ට පමණයි.