අරුණ විදානගමගේ නොහොත් ‘කජ්ජා’ ඝාතනය කිරීමෙන් අනතුරුව එම ඝාතනයේ වගකීම භාරගැනීමට තවත් අපරාධකරුවන් පිරිසක් සූදානමින් සිටිය ද, ඔහුගේ දරු දෙදෙනාද එහිදී ඝාතනය වීමෙන් පසුව ඔවුන් එහි වගකීම භාරනොගත් බව නැඳුන්බැගොඩ නිර්මල ප්රසාද් නොහොත් ‘බැකෝ සමන්’ අනාවරණය කර තිබෙනවා.
මේ වනවිට රැඳවුම් නියෝග මත බස්නාහිර පළාත් උතුර අපරාධ කොට්ඨාසය ඔහුගෙන් සිදුකරන ලද ප්රශ්න කිරීම්වල දීයි බැකෝ සමන් මේ බව පවසා ඇත්තේ.
තමාගේ මත්ද්රව්ය ජාලය සම්බන්ධයෙන් තොරතුරු හෙළිකිරීම කජ්ජා ඝාතනයට හේතු වූ බවත් බැකෝ සමන් මෙහිදී අනාවරණය කර තිබෙනවා.
මේ අතර කජ්ජා ඝාතනයෙන් පසු තමාට එල්ලවන චෝදනාවලින් බේරීම වෙනුවෙන්, ඝාතනයෙන් පසු තමන් කජ්ජාගේ බිරිඳගේ බැංකු ගිණුමකට රුපියල් ලක්ෂ තුනහමාරක මුදලක් ගිණුම්ගත කළ බවයි ඔහු පවසා ඇත්තේ.
එමෙන්ම තමන්ට කජ්ජාගේ දරු දෙදෙනා ඝාතනය කිරීමට කිසිඳු උවමනාවක් නොතිබූ බවත් ඔහු විමර්ශන නිලධාරීන් හමුවේ අනාවරණය කර ඇති බවයි වාර්තා වුණේ.
මේ අතර කජ්ජා ඝාතනය සම්බන්ධයෙන් තමන් කිසිවක් දැන නොසිටි බවත්, බැකෝ සමන්ගේ උපදෙස් මත ඝාතනයක් සඳහා ගිනිඅවි ලබා දුන්න ද එය කජ්ජා ඝාතන කිරීමට බව තමන් නොදැන සිටි බවත් සම්පත් මනම්පේරි නැමැත්තාගෙන් සිදුකළ ප්රශ්න කිරීම්වල දී නිලධාරීන් හමුවේ පවසා තිබෙනවා.
සම්පත් මනම්පේරි සිදුකරන ප්රකාශ තහවුරු කරගැනීම සඳහා තවදුරටත් විමර්ශන සිදුකරන බවයි පොලිසිය සඳහන් කළේ.
ඒ, අනුව කජ්ජා ඝාතන කළ කාල වකවානුව තුළ සම්පත් මනම්පේරිගේ දුරකථන දත්ත වාර්තාවක් ලබා ගැනීමට ද පොලිසිය කටයුතු කර ඇති බවයි වාර්තා වන්නේ.
මේ අතර රගර් ක්රීඩක වසීම් තජුඩීන් ඝාතනය වීමට පෙර ඔහුගේ මෝටර් රථය පසුපස ගමන් ගන්නා ජීප් රථයේ අනුර විදානගමගේ නොහොත් ‘කජ්ජා’ ගමන් කළ බවට මෙතෙක් සිදුකළ විමර්ශනවලට අනුව තහවුරු වී ඇති බව අපරාධ පරීක්ෂණ දෙපාර්තමේන්තුව සඳහන් කරනවා.
