ලන්දේසි යටත් විජිත සමයේ ශ්රී ලංකාවෙන් නෙදර්ලන්තයට රැගෙන ගොස් යළි මෙරටට භාරදෙන ලද කෞතුක භාණ්ඩ මහජන ප්රදර්ශනය සඳහා විවෘත කිරීම ජාතික කෞතුකාගාරයේ දී අද (05) සිදු වුණා.
ඒ, බුද්ධ ශාසන සහ සංස්කෘතික කටයුතු අමාත්ය විදුර වික්රමනායක සහ ජාතික ආරක්ෂාව පිළිබඳ ජනාධිපති ජ්යෙෂ්ඨ උපදේශක හා ජනාධිපති කාර්ය මණ්ඩල ප්රධානි සාගල රත්නායකගේ ප්රධානත්වයෙන්.
නෙදර්ලන්තයේ සුප්රසිද්ධ Rijks කෞතුකාගාරයේ තැනපත් කර තිබූ රනින් නිම කරන ලද කොපුව සහිත කස්තානයක්, රිදියෙන් නිම කරන ලද කොපුව සහිත කස්තානයක්, රනින් නිමකළ පිහියක්, මහ තුවක්කු දෙකක් සහ ලෙව්කේ දිසාවේ හට අයත්ව තිබූ බවට සැලකෙන කාලතුවක්කුවක් වර්ෂ 1765 දී ලන්දේසීන් මහනුවර රජ මාලිගාව වටලන අවස්ථාවේ දී ලන්දේසි පෙරදිග ඉන්දීය වෙළෙඳ සමාගම විසින් රැගෙන ගොස් ඇති බවට තහවුරු වුණා.
පසුකාලීනව පර්යේෂණයකින් සිදු කරන ලද තහවුරු කිරීම් මත පදනම්ව මෙම කෞතුක භාණ්ඩ 06 නැවත ශ්රී ලංකාවට භාරදෙන ලෙස රාජ්ය තාන්ත්රික ඉල්ලීමක් සිදුකර තිබුණා.
ඒ, අනුව දෙරට අතර රාජ්ය තාන්ත්රික සබඳතා ශක්තිමත් කිරීමේ සුවිශේෂ අවස්ථාවක් ලෙස මෙම කෞතුක භාණ්ඩ 06 නිල වශයෙන් ශ්රී ලංකාවට භාරදීමට නෙදර්ලන්ත රජය කටයුතු කළා.
මෙම කෞතුක භාණ්ඩ අද (05) දින සිට නැවත දැනුම් දෙන තුරු කොළඹ ජාතික කෞතුකාගාරයේ මහජන ප්රදර්ශනයට තැබීමට නියමිතයි.
එම අවස්ථාව සනිටුහන් කරමින් විශේෂ සමරු මුද්දරයක් ද නිකුත් කිරීම ද මෙහි දී සිදු කෙරුණා.
