ඔස්ට්‍රෙලියානු ටෙස්ට් ක්‍රිකට් ඉතිහාසයේ සිව්වැනි ළාබාලතම ක්‍රිකට් ක්‍රීඩකයා ලෙසින් ඉන්දියාවට එරෙහිව මංගල ටෙස්ට් වරම් හිමිකර ගැනීමට සෑම් කොන්ස්ටාස් සමත් වී තිබෙනවා.
එරට ක්‍රීඩා මාධ්‍ය වාර්තා කර ඇත්තේ එළඹෙන දෙසැම්බර් මස 26 වැනිදා ඉන්දියාවට එරෙහිව ආරම්භ වන සිව්වැනි ක්‍රිකට් තරගයට මෙල්බර්න් නුවර දී සෑම් තරග බිමට පිවිසෙනු ඇති බවයි.
සෑම් කොන්ස්ටාස් යනු නව යොවුන් ක්‍රීඩකයෙකු වන අතර ඔහු තවමත් පසුවන්නේ වයස අවුරුදු 19යි දින 85ක් පමණයි.
ඉන්දියාවට එරෙහි ව ආරම්භක ටෙස්ට් තරග තුනේ දී ම පිත්තෙන් ලකුණු 14.40ක සාමාන්‍යයක් ලබා ගත් ආරම්භක පිතිකරු නේදන් මැක්ස්වීනි වෙනුවටයි සෑම් මෙවර කණ්ඩායමට කැඳවා ඇත්තේ.
මීට පෙර ඔස්ට්‍රෙලියානු ඉතිහාසයේ තෙවැනි ළාබාතලම ක්‍රීඩකයා වී ඇත්තේ 1953 දී පිටියට ආ ඉයන් ක්‍රේග්ගෙන්.
කොන්ස්ටාස් අවසන් වරට මෙල්බර්න් හි දී ක්‍රීඩා කරන විට ඔස්ට්‍රෙලියානු A කණ්ඩායම වෙනුවෙන් ඉන්දීය A කණ්ඩායමට එරෙහිව නොදැවී ලකුණු 3ක් සහ ලකුණු 73ක් රැස් කරගැනීමට ද සමත් වුණා.
බ්‍රිස්බේන්හි පැවැති තෙවැනි ටෙස්ට් තරගය වර්ෂාවෙන් ජය පරාජයෙන් තොරව අවසන් වීමත් සමඟ ඔස්ට්‍රේලියානු – ඉන්දීය බෝඩර් ගවස්කාර් ටෙස්ට් තරගාවලිය 1-1ක් ලෙස සම තත්ත්වයට පත්ව තිබෙනවා.
