ඔන්මැක්ස් ඩී.ටී. නීතිවිරෝධී පිරමීඩාකාර මූල්‍ය සමාගමේ දෙවන පෙළ අධ්‍යක්ෂවරයෙකු වන ලුණුගම්වෙහෙර කට්ටඩිගේ දිනේෂ් චානක සැකකරු ලබන 20 දින දක්වා රක්ෂිත බන්ධනාගාර ගත කිරීමට කොළඹ ප්‍රධාන මහේස්ත්‍රාත් තනුජා ලක්මාලී මහත්මිය අද (06) නියෝග කළා.
පසුගිය වසරේ (2024) මැයි මස තුන්වෙනි දින දිනේෂ් චානකට එරෙහිව අධිකරණය මගින් වරෙන්තු නියෝග නිකුත් කළ අතර සැකකරු පසුගිය 05 දින ඩුබායි රටේ සිට මෙරටට පැමිණි පසුව රහස් පොලිසිය මගින් අත්අඩංගුවට ගෙන අධිකරණයට ඉදිරිපත් කෙරුණා.
සැකකරු වෙනුවෙන් පෙනී සිටි නීතිඥ අනුර ද සිල්වා මහතා කරුණුු දක්වමින් විමර්ශනයන්ට සහාය දක්වන සිය සේවාදායකයා ඕනෑම කොන්දේසියක් යටතේ ඇප නියම කරන ලෙස ඉල්ලා සිටියා.
රහස් පොලිසියේ මුල්‍ය අපරාධ විමර්ශන කොට්ඨාසය කියා සිටියේ තැන්පත්කරුවන් හය දෙනෙකු මෙම සැකකරුගේ ගිණුමට රුපියල් කෝටි දෙකකට අධික මුදල් ප්‍රමාණයක් බැර කර ඇති බවට පැමිණිලි ලැබී ඇති බවත් ,රුපියල් කෝටි තිහකට අධික තැන්පතු මෙම සැකකරු විසින් භාරගෙන ඇති බවට තොරතුරු අනාවරණය වන බවත්, ඒ සම්බන්ධයෙන් තවදුරටත් විමර්ශන සිදු කරන බවයි.
සැකකරුගේ බැංකු ගිණුම් වාර්තා ලබා ගැනීම ඇතුළු තවදුරටත් විමර්ශන සිදු කරන බවට බව ද ,සඳහන් කළා.
බැංකු පනතේ 83 අ (1) වගන්තියට අනුව සහ 2011 අංක 40 දරන පනතේ 2006 අංක 05 දරන මුදල් විශුද්ධීකරණය වැළැක්වීමේ පනතේ 3 වන වගන්තියට අනුව දඬුවම් ලැබිය හැකි වරදක් සිදු කිරීම සම්බන්ධයෙන් මෙම විමර්ශන සිදු කරන බව ද පැවසුවා.
විමර්ශන අවසන් නොමැති බැවින් ඇප නියම නොකරන ලෙස ද ඉල්ලා සිටියා.
