බංග්ලාදේශය සමඟ තරග තුනකින් සමන්විත විස්සයි විස්ස තරගාවලිය තරග එකට බිංදුවක් ලෙස පෙරමුණ ගන්නට සත්කාර ඉන්දීය කණ්ඩායමට ඊයේ (06) හැකියාව ලැබුණා.
ඒ, ඊයේ ග්වාලියර් හිදී පැවති පළමු තරගය කඩුලු 07කින් ජය ගැනීමත් සමඟයි.
මෙම තරගයේ පළමුව පන්දුවට පහර දින බංග්ලාදේශ ඉනිම පන්දුවාර 19යි පන්දු 05ක් තුළ සියල්ලන් දැවී ලකුණු 127කර සීමා වුණා.
අනතුරුව ලකුණු 128ක් ජයග්‍රාහී ඉලක්කයක් හඹා ගිය ඉන්දීය කණ්ඩායම එම ඉලක්කය පන්දුවාර 11යි පන්දු 05ක් තුළ කඩුලු තුනක් පමණක් දැවී පසුකර යමින් තරගය ජයගත්තා.
එහිදී පන්දු 16ක් තුළ නොදැවී ලකුණු 39 ක් රැස් කරමින් හර්දික් පාණ්ඩ්‍යා ඉන්දීය කණ්ඩායම අවසානයේ ජයග්‍රහණය කරා රැගෙන ගියා.
මෙම තරගයේ දී පාණ්ඩ්‍යා එල්ල කර පහරක් පිළිබඳව මේ වනවිට ක්‍රිකට් ලෝකයේ කතා බහට මතුව තිබෙනවා.
පාණ්ඩ්‍යා වේග පන්දු යවන ක්‍රීඩක ටස්කින් අහමඩ්ගේ පන්දුවාරයක දී පිට පිට හතරේ පහර තුනක් එල්ල කරන අතර, ඔහු කඩුලු රකින්නාගේ හිසට ඉහළින් යොමු කළ ආකර්ෂණීය පහර ද ඊට ඇතුළත්.
ක්‍රිකට් විස්තර විචාරකයින් පාණ්ඩ්‍යා එල්ල කළ මෙම පහර හඳුන්වනු ලැබුවේ නෝ-ලුක් පහර ලෙසයි.
