හොරණ මිල්ලනිය ප්‍රදේශයේ සිදු වූ අනතුරකින් පාපැදියෙන් රැකියාවට යමින් සිටි 24 හැවිරිදි තරුණයෙකු අද අළුයම මියගොස් තිබෙනවා.
කොම්පඤ්ඤවීදිය ප්‍රදේශයේ ඉදිකරමින් පවතින පාලමක් සඳහා ගල් රැගෙන යමින් සිටි ටිපර් රථයකට යට වීමෙන් මෙම අනතුර සිදුවී ඇති බවයි අප වාර්තාකරු සඳහන් කළේ.
අනතුරින් මියගොස් ඇත්තේ හල්තොට කොස්කන්ද ප්‍රදේශයේ පදිංචිව සිටි තරුණයෙක්.
අනතුරින් පසු පළා ගොස් තිබූ ටිපර් රථය හඳුනාගෙන එහි රියැදුරු පොලිස් අත්අඩංගුවට ගෙන තිබෙනවා.
අනතුරින් මියගිය තරුණයා රැකියා ස්ථානය කරා යාම සඳහා අරුක්ගොඩ ප්‍රදේශයේ සිට පාපැදියෙන් යාමේදී පැමිණි ටිපර් රථයට යටවී මෙම අනතුර වී ඇති බවටයි පොලිස් විමර්ශනවලදී අනාවරණ වී ඇත්තේ.
තරුණයා අනතුරකට ලක් වී පාපැදිය මත ම වැටී සිටින අයුරු එම ස්ථානයෙන් ගමන් ගත් ඥාතියෙකු දැක පොලිසියට දැනුම් දී තිබෙනවා.
අනතුරුව එම අවස්ථාවේදී කළු ගල් පටවා ගෙන එම මාර්ගයේ ගමන් ගත් ටිපර් රථ 4ක් හඳුනාගෙන ඒවා පොලිසිය වෙත ගෙන්වා සිදු කළ විමර්ශනයකින් අනතුරුවයි සැකකාර ටිපර් රථ රියදුරා අත්අඩංගුවට ගෙන ටිපර් රථය පොලිස් භාරයට ගෙන ඇත්තේ.
පාපැදිය ටිපර් රථයේ ඉදිරිපස දකුණු ප්‍රදේශයේ ගැටී ඇතැයි පොලිසිය ප්‍රකාශ කළා. අත්අඩංගුවට ගත් ටිපර් රථ රියදුරා ද අරුක්ගොඩ ප්‍රදේශයේ පදිංචිකරුවෙක්.
මියගිය තරුණයාගේ පශ්චාත් මරණ පරීක්ෂණය හොරණ මූලික රෝහලේ දී සිදුකිරීමට නියමිතයි.
