වසරේ පළමු පොහොය දිනය ලෙස සැළකෙන උතුම් දුරුතු පුර පසළොස්වක පොහෝ දිනය අදට යෙදී තිබෙනවා.
ආගමික සහ ශාසනික වශයෙන් වැදගත් සිදුවීම් රැසක් මෙම දුරුතු පොහෝ දිනයේ සිදුව ඇති බව ශාසන ඉතිහාසයේ සඳහන්.
බුදුරජාණන් වහන්සේගේ ප්රථම ලංකා ගමනය සිදුවන්නේ දුරුතු පොහෝ දිනයේ වන අතර, මහියංගනයට වැඩම කළ බුදුන්වහන්සේ යක්ෂයින් දමනය කිරීම අද වැනි පොහෝ දිනක සිදුවූ බව ඉතිහාසයේ සඳහන් වනවා.
බුදුරජාණන් වහන්සේගෙන් ධර්මය අසා සෝවාන් ඵලයට පත් සුමන සමන් දෙවියන්ට කේශ ධාතු මිටක් ලබාදීම ද දුරුතු පෝදා සිදු වූ බවයි ඉතිහාසයේ දැක්වෙන්නේ.
තුන්බෑ ජටිලයන් දමනය කිරීමත්, බිම්බිසාර රජතුමා වේළුවනාරාමය බුදු සසුනට පූජා කිරීමත් සිදුවී ඇත්තේ ද අද වැනි දුරුතු පොහෝ දිනයකයි.
එමෙන්ම අදට දී ඇති දුරුතු පොහෝ දිනය වෙනුවෙන් දිවයිනේ බොහෝ වෙහෙර විහාරස්ථානවල විශේෂ ආගමික වතාවත් සිදුකෙරෙනවා.
මේ අතර “දසත බෝ පත” වැඩසටහන මෙවර විකාශය කෙරෙන්නේ මීගමුව, දකුණු කදිරාන ශ්රී සෝභාරාම විහාරස්ථානයේ සිටයි.
ඒ අනුව අද දවස පුරා දසත නිල ෆේස්බුක් සහ යූටියුබ් නාලිකා ඔස්සේ “දසත බෝපත” දුරුතු පෝ දා සජීවී වැඩසටහන සමගින් සම්බන්ධවීමේ හැකියාව ඔබට පවතිනවා.
