ඊශ්‍රායල – ලෙබනන් සටන් විරාමය සමග දහස් ගණනක් සිවිල් වැසියන් යළි නිවෙස් වෙත

ඊශ්‍රායලය සහ ලෙබනනයේ හිස්බුල්ලා සංවිධානය අතර සටන් විරාම ගිවිසුමකට එකඟ වීම මත මේ වනවිට (27) දහස් ගණනක් වූ ලෙබනන වැසියන් සිය නිවෙස් බලා යාම ආරම්භ කර තිබෙනවා.

විදෙස් මාධ්‍ය වාර්තා සඳහන් කළේ; ලෙබනන් වැසියන් දකුණු ලෙබනන තීරය වෙත පිටත්ව යාම ආරම්භ කර ඇති බවයි.

ඊයේ (26) පස්වරු 02ට පමණ මෙම සටන් විරාම ප්‍රකාශයට පත් කෙරුණා.

කෙසේවෙතත් ඊශ්‍රායලය ප්‍රකාශ කර සිටින්නේ; ලෙබනන් සිවිල් වැසියන් දහස් ගණනක් දකුණේ සිය නිවෙස් කරා ආපසු යාමට පටන් ගැනීම සිදු වුණ ද, ඇතැම් ප්‍රදේශවලට ගමන් කිරීම එතරම් සුදුසු නොවන බවයි.

ඊශ්‍රායල – පලස්තීන සටන් අතරතුර ලෙබනනයට ද ප්‍රහාර එල්ල කෙරුණු අතර මාස 13ක පමණ කාලයක් දෙපාර්ශ්වය අතර දරුණු ගණයේ යුද ගැටුම් ඇති වුණා.

කෙසේවෙතත් ඊශ්‍රායල සහ ලෙබනනය සටන් විරාමයකට එළඹීමට එකඟ වන්නේ නම්; සිය පූර්ණ සාහය ලබාදෙන බවයි අමෙරිකානු ජනාධිපති බයිඩ්න් ප්‍රකාශ කර තිබුණේ.

ඔහු විසින් ප්‍රකාශයට පත් කරන ලද ගිවිසුම ප්‍රකාරව ලෙබනන් හමුදාවේ 5000ක භට පිරිසක් දකුණු ලෙබනනය ආරක්ෂා කිරීමට ද යෙදවීමට එකඟ වී තිබෙනවා.

එමෙන්ම ලෙබනන් වැසියන් දකුණු ලෙබනනයට ගමන් කිරීම ආරම්භ කිරීමත් සමග බීරූට් හි ප්‍රධාන මහා මාර්ගයේ රථවාහන තදබදයක් ද හටගෙන ඇති බවයි වාර්තා වන්නේ.

හිස්බුල්ලා සංවිධානයෙන් වසරකට ආසන්න රොකට් ප්‍රහාරවලට ප්‍රතිචාර වශයෙන් ඊශ්‍රායල හමුදා මීට මාස දෙකකට පමණ පෙර ලෙබනනයට ගොඩබිම් ආක්‍රමණයක් ආරම්භ කළා.

නමුත් යුද්ධ විශ්ලේෂකයින් පෙන්වාදෙන්නේ ලෙබනනයේ සටන් විරාමය ගාසා තීරයේ ඊශ්‍රායලයේ යුද්ධයට සෘජුවම බලනොපාන බවයි.